O salón d’o comic de Zaragoza celebra a suya XII edición

O salón ubre as puertas viernes, sabado y domingo ta totz os aficionaus a iste arte. Decenas d'actividatz implen un programa prou intenso y intresant.

cartelMientres iste cabo de semana, Zaragoza acullirá a XII edición d’o suyo salón d’o comic, capuzando-se por bells diyas en o mundo d’a historieta. Dende o viernes dica o sabado, en a Sala Multiusos de l’Auditorio se podrán viyer as zaguers novedatz d’o mundo d’o comic y o fanzine, conoixer a los autors y participar en a patacada d’actividatz proposadas dende a organización. Tots os colectivos d’a ciudat relacionaus con o comic y o manga i participan, como son Malavida, Thermozerso, Mangaku, Tatakae y l’Asociación Daruma de Comic y Cultura Chaponesa.

O cartel anunciador de l’evento d’estianyo lo ha feito Santi Jurado de l’Asociación Malavida, qui “quereba vinclar-lo con o cartel de l’anyo pasau, obra de Dionisio Platel, y inspirau en atro tiempo a on que as revistas y as historietas yeran qualcosa popular“.

O salón no se queda nomás en a Multiusos y tamién se podrán viyer exposicions mientres tot lo mes. En o Centro Civico Joaquín Roncal i será la exposición Pasos Encontrados. Un Viaje Dibujado de Alfonso Zapico, entre que en o Centro Civico Universidad, se ferá un homenache a los 50 anyos de Mafalda, a on que se viyerán as intepretacions que han feito d’o personache bells autors aragoneses. Tamién bellas librerías especializadas han organizau mientres istos diyas as suyas propias exposicions.

En ista edición continará fendo-se l’espacio Comicteca, enguerau en l’anyo pasau, a on que se fan actividatz endrezadas t’os mas chovens. A iste espacio cal adhibir-le-ie unatro nuevo a con que se meterá una cafetería, una “cantonada de l’autor” y a on que bi habrá una triga d’obras que aculle o Museu d’o Dibuixo de Larrés.

A dentrada cuesta nomás un euro y se regala un comic feito de conchunta entre qualques autors aragoneses, clamau o “Tebeico” ta tot qui i dentra. Os menors de 12 anyos i dentran de baldes Mientres os tres diyas s’han programau charradas, firmas d’autors, presentacions, tallers,  y toda mena d’actividatz t’adultos y ninos

Toda la información se puede consultar en a web d’o salón.

Una rispuesta a O salón d’o comic de Zaragoza celebra a suya XII edición

  1. Pingback: O salón d’o comic de Zaragoza celebra a suya XII edición | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.