O salón d’o comic de Zaragoza fa a suya XI edición

Mientres tres diyas os aimants d'os tebeos se trobarán con autors, editors y botiguers en l'Auditorio de Zaragoza

Un d'os puesto d'a zaguer edición d'o Salón (Foto: Salón del comic)

Un d’os puesto d’a zaguer edición d’o Salón (Foto: Salón del comic)

O mundo d’o comic tien una fita ya fixa totz os avientos en Zaragoza, a on que se trobarán, autors, editors, botiguers, lectors y aficionaus a iste arte. O salón d’o comic, que cumple ya 11 anyadas, se celebrará en Zaragoza entre o 14 y o 16 d’aviento en a Sala Multiusos de l’Auditorio.

Más d’una cinqüentena d’expositors darán vida a lo salón dende a tardi d’o viernes. Entre ells, botigas, editorials u fanzines de toda mena. Como atras anyadas, a dentrada costará nomás 1 euro, podendo fer-la servir mientres os tres diyas que dura o salón, y con ella se ferá entrega d’o “Tebeico del salón“, que ye una replega d’historias y debuixos feitos por beluns d’os autors que i colaboran.

Entre os autors que i serán, se trobarán bells convidaus como Manel Fontdevila, David Rubín, Mauro Entrialgo, Alfonso Zapico, Bartolomé Seguí, Gabi Beltrán u Alvaro Ortiz que sinyarán as suyas obras.

Mientres os tres diyas, se ferán presentacions, charradas y tallers de toda mena, relacionaus con o mundo d’0 comic. T’os más chicotz bi habrá tamién tallers ta prencipiar a dibuixar tebeos de man de diferents dibuixants.  O viernes, a chornada rematará con o mosical La leyenda de Zelda, que interpretará l’Asociación Daruma en o Centro Civico Universidat, y o sabado con Manga Hellsing, de l’Asociación Magaku en o mesmo puesto.  Rufiertas, campionatos de videochuegos, y muita chent disbrazada son tamién parti d’a ufierta d’o cabo de semana más comiquero de l’anyada. A programación completa se irá penchando en a web d’o salón.

As exposicions relacionadas con os comics tamién serán presents mientres o mes en Zaragoza. O Centro Joaquín Roncal acullirá “Manel Fontdevilla se confiesa”, d’o dibuixant de El Jueves y Eldiario.es. Spiderman celebrará o suyo 50eno cabo d’anyo con una exposición en o Centro Civico Universidat. A FNAC será a siede d’as exposicions “O Heroe” de David Rubín y “Malefic Time” de Luis y Rómulo Royo. Best friends forever ye o titol d’a exposición que tendrá Erica Fustero en “El Armadillo Ilustrado” y en Excelsior Comics se podrá visitar EDGAR-MAX, d’a revista Thermozero y Cthulhu.

O Salón conta con a colaboración de l’Auditorio de Zaragoza y d’os colectivos Malavida, Thermozero, Mangaku y Tatakae, y d’o patrocinio de Caja Inmaculada. En istas zaguers edicions i son pasadas decenas de mils de personas convertindo-se en un d’os grans salons celebraus en Zaragoza.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.