O School s’imposa a o CAI en o derbi

Y en a División d'Honor masclina, Helios enampla a suya mala racha y se mira ya bien amán os puestos de baixada

Imachen d'a trobada de Segunda División, disputada entre School Zaragoza y Vilafranca. (Foto: Comunicación Tenis de Mesa)

En Primera División femenina, o School Zaragoza s’imposó por 1-5 a o CAI Santiago en o derbi aragonés, prenendo asinas a revancha d’o choque d’ida. Marina Terrado doblegó ista vez por 0-3 a la base caista Sara Escota y tamién a Yara Grimal por o mesmo resultau, mientres que Elena Lozano ganó 1-3 a María Vallespí. a chugadora francesa Claire Noel, que debutaba con o School, venció a Grimal (2-3) y a Vallespí (0-3). O solo tanto d’o CAI l’aconsiguió Sara Escota debant d’Elena Lozano (3-0).

Con iste resultau, o School contina lider en solitario con un balanz de 7 victorias y una redota, encara que a zaguera hora ha crebau as negociacións con a palista nicheriana Noimot Olaide, que iba a reforzar a l’equipo en a segunda tornada pensando en a fase de puyada. Por a suya parte, o CAI contina luitando por remanir en as atras dos plazas que dan acceso a la promoción por puyar a División d’Honor.

D’atra man, o C.N. Helios cayó por 4-2 en a pista d’o Y.T.M Torrelavega, un rival directo en a luita por a permanencia, y contina sin conoixer a victoria dende que prencipió l’anyo 2012 en a División d’Honor de tenis de mesa. A clau d’a trobada estió lo doble triumfo d’o base cantabro, o defensivo David Chamorro, sobre totz dos millors palistas*heliofilos, Alfonso Beamonte (3-1) y Marcelo Toledo (3-2), iste zaguer dimpués d’igualar o 2-0 inicial y abanzar a 3-9 en o cinqueno set. Como ye habitual, o tercer chugador Víctor Dobato no podió puntuar, por o que de brenca sirvioron as victorias de Beamonte sobre Andrés Pérez (1-3) y de Toledo debant de Salvador Alfonso (1-3).

Helios enampla asinas a suya racha negativa y queda a o borde d’os puestos de baixada, con solo que una victoria mas que o Borges y o propio Torrelavega, que amás ha disputau un partiu menos.

En Segunda División masclina, o School Zaragoza padeixió una dolorosa redota por 3-4 debant d’o C.T.T. Vilafranca, un rival directo que le ha arrebatau a tercera posición d’o grupo embolicando seriosament as aspiracions de puyada d’os aragoneses. Felipe Contreras amarró los suyos dos tantos, Ricardo Pérez ganó un individual y perdió unatro por 2-3, mientres que Paul Delfont no podió puntuar, por o que a trobada se decidió en o dobles, que cayó d’o costau catalán por un achustau 2-3.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.