O secretaire cheneral de FERRMED y o consellero catalán de Territorio y Sostenibilidat en contra d’a TCP

Joan Amorós, secretaire cheneral de FERRMED declara en una entrevista a Vilaweb que no refirma a TCP, mientras que o consellero catalán de Territorio y Sostenibilidat la califica de "imposible, antieconomica y faraonica".

Gara Internacional de Canfranc (Foto: Biquipedia)

A ministra de Fomento espanyola, Ana Pastor, presentó ahiere una proposa de Rete Transeuropeu de Transportes que recupera o corredor a traviés de Canfranc. Dende o diario catalán Vilaweb han entrevistau por dito motivo a Joan Amorós, secretaire cheneral de FERRMED, asociación que arrocla a decenas d’interpresas y institucions de toda la Unión Europea en favor de l’empente d’o Gran Exe Ferroviario de mercancías Escandinavia-Rin-Roine-Mediterranio Occidental y a un desenvolique más sostenible.

A proposa tamién incluye os corredors Atlantico y Mediterranio, pero Pastor dició que darban a mesma prioridat en o corredor central que a os atros dos, sin rebaixar os recursos. En octubre de l’atro anyo a Comisión Europea (CE) adoptó o corredor mediterranio como eixe prioritario d’o Rete de Transportes Transeuropeu, en un prochecto que tamién aconsigue os corredors atlantico y central -iste d’Alchezira ta Zaragoza pasando por Madrit.

O president de FERRMED, asociación que mira por a millora d’a competitividat europea asegura en dita entrevista que no achuga por que se’n faigan totz sin priorizar garra, sino que “hemos de tener prou fuerza porque, as inversións, las faigan prioritariament a o corredor mediterranio”. Sobre si son necesarios totz os corredors, Amorós diz que “o corredor atlantico ye indiscutible. O corredor central, d’Andalucía ta Madrit, tamién. O corredor que va de Lisboa, pasa por Madrit y Zaragoza y plega en Catalunya por Tarragona y Barcelona, tamién ye muit important. Permite que os portugueses puedan ir t’o sur de Francia y ta l’este d’Europa por o camín mas corto y rapido. Totz istos corredors son indiscutibles.”

Pero sobre o paso d’o corredor central por Canfranc, Amorós contesta “o corredor central por o Pirineu no se chustifica economicament de garra traza. Antes de decidir si ha de salir de Zaragoza, talment nos habríanos de preguntar si no caldría que salise de Leida. Ye una opción que ya s’heba planificau fa tiempo y que tenemos meyo muerta porque os catalans no la hemos sabiu esfender. Si ells proposan ista opción por Canfran, hemos de contraponer l’eixe occidental de Catalunya. Ye un eixe fundamental que sale de l’Aldea y Tortosa, va enta Leida y, aprofitando a linia d’a Puebla, enta alto”.

O president de FERRMED, insiste en que cal barallar por a prioridat d’inversións a o corredor mediterranio por que “ye o que tiene más potencialidat economica”. Y sobre a decisión d’a ministra i adhibe: “Siempre salen con isto d’o café ta totz. Isto ya lo sabemos y no nos ha de sorprender. A yo, tot isto me preocupa relativament. Ixo que agora me preocupa de verdat ye mirar d’influir ta aconseguir que inviertan prioritariament a o corredor mediterranio, encara que sía sin fer ruido. A cosa important ye que se faiga. O dossier que presentaremos a la ministra ye muit bien feito, tecnicament. Le exposamos qué s’ha de fer a plazo corto, meyo y largo y le contrimostramos que o torno d’a inversión será gordo. Brenca de politica, simples datos y consideracions scientificas”.

D’atra man, seguntes publica Heraldo de Aragón, o consellero de Territorio y Sostenibilidat catalán, Lluis Recoder, tamien manifestó ahiere que ye “de raso en contra” de fer a Travesía Central por os Pirineus, calificando-la de “imposible, antieconomica y faraonica” y ha instau a l’Estau a priorizar atros proyectos como o rete ferroviario de cercanías d’a capital catalana.

Fuent: http://www.vilaweb.cat/noticia/3984976/20120216/amoros-corredor-central-pirineu-justifica-economicament.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.