O Senau paraguayo destituye a o president Fernando Lugo

Muitos paises latinoamericanos denuncian un 'golpe d'estau' y no reconeixen a o sucesor

O Senau paraguayo ha aprebau a destitución d’o president, Fernando Lugo, dimpués de fer-le un ‘chuicio politico’ por haber deixau que ‘s’impose a inestabilidat institucional en o país’, mas que mas a resultas d’os disturbios d’a semana pasada en a localidat de Curuguaty, a on decisiet personas perdioron a vida en peleyas entre labradors y policía. A Camara de diputaus d’o Paraguay resolvió o chueves d’examinar a responsabilidat de Lugo en os feitos y ahiere o Senau lo destituyó por trenta y nueu votos a favor y nomás quatro en contra. O vicepresident Federico Franco, d’a oposición liberal, ha asumiu o cargo.

En una comparecencia en a residencia presidencial, o Palacio de López, Lugo ha deplorau a destitución, que ha qualificau de truco ‘cobarde y con alevosía’ empentau por una ‘dreita periglosa’, en alusión a o Partiu Liberal Radical Autentico (PLRA), que obtiene o poder d’a man d’o dica agora vicepresident, Federico Franco. ‘Hue salgo por a puerta mas gran d’a patria: por a puerta d’o corazón d’os míos compatriotas.’

O mandatario salient ha criticau a maniobra politica empentada por o prencipal partiu d’a oposición: ‘Ye a historia paraguaya sin democracia a que ha estau ferida fundament. Aspero que os suyos executors tiengan present a gravedat d’os suyos actos’, ha adhibiu. ‘No ye Fernando Lugo qui ye destituyiu, ye a historia paraguaya, a democracia ye a que ha estau ferida fundament y transgredida.’

‘Siempre he actuau en o marco d’a lei, a tamás de que s’haiga tuerto’, ha afirmau en tono solemne: ‘Me sozmeto a la decisión d’o Congreso, pero soi disposau a responder como ex-mandatario.’

‘Con quasi quatro anyos d’exercicio d’a presidencia d’o Paraguay, hue me despido como president d’a Republica, pero no me despido como ciudadano paraguayo y he de servir a ista nación allá a on m’ameniste, tal como heba churau; no respondo en clases politicas, no respondo a la mafia ni a o narcotrafico, he respondiu y responderé a o clamamiento d’os compatriotas.’

L’exbispe catolico Fernando Lugo aconsiguió aturar, con l’acceso a la presidencia en abril de 2008, a hechemonía de sixanta y un anyo d’o Partiu Colorau a o frent d’o gubierno d’o Paraguay.

A Constitución d’o Paraguay preveye en l’articlo 225 que o president d’a Republica puede estar sozmeso a un chuicio politico ‘por mal desempenyo d’as funcions, por delitos cometius en l’exercicio d’os suyos cargos u por delitos comuns’. L’acusación ha d’estar presentada por a Camara de diputaus y recibir l’emparo de dos tercios d’os lechisladors.

O zaguer chuicio politico a un president paraguayo ocurrió en 1999 quan Raúl Cubas estió acusau de mala chestión d’as suyas funcions a resultas de l’asesinato de l’alavez vicepresident, Luis Argaña, y a muerte de siet manifestants. Cubas renunció a o cargo antes que no s’acabase o proceso chudicial. En o caso d’o president Lugo, o detonant estió a muerte de decisiet personas en as peleyas que se producioron fa una semana quan a policía irrumpió en a finca Morumbí, propiedat de l’exsenador de l’opositor Partiu Colorau Blas Riquelme, ta desaloixar a o centenar de labradors que dende feba tres semanas ocupaba a finca ta protestar por a escasez de tierras agricolas. Iste feito desembocó en a dimisión d’o ministro d’Interior, Carlos Filizzola, y d’o comandant d’a Policía, Paulino Rojas, acceptadas por Lugo.

Protestas en a carrera y internacionals

Mils de personas s’heban reuniu debant d’o Senau en refirme de Lugo y, dimpués d’a votación, se producioron qualques incidents y peleyas entre manifestants y fuerzas de seguridat. I ha habiu no menos de diez personas feridas. Amás, o grupo Anonymous s’ha responsabilizau chusto decamín d’a destitución de l’ataque contra a web d’a presidencia paraguaya, a la quala encara no se puede acceder-ie.

Difuera d’o país, a mayoría de países latinoamericanos han denunciau a destitución de Fernando Lugo y la han considerada un golpe d’estau. En qualques casos, como o d’os gubiernos de Bolivia y Venezuela, ya han anunciau que no reconoixerán a o nuevo president en funcions, porque ha plegau en o poder gracias a un ‘golpe d’o congreso’ chestau por os ‘neoliberals’ en colaboración con terratenients locals.

Fuent: http://www.vilaweb.cat/noticia/4022788/20120623/senat-paraguaia-destitueix-president-fernando-lugo.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.