O “sí” gana en o referendum sobre o matrimonio homosexual en Irlanda

L'apoyo a la legalización d'o matrimonio homosexual s'imposa en quasi todas as circumscripcions de Dublín y en as d'as zonas rurals

Foto: Ludovic Bertron (CC-BY 2.0)

Foto: Ludovic Bertron (CC-BY 2.0)

O recuento d’o referendum celebrau iste viernes en Irlanda ta decidir sobre a legalización d’o matrimonio entre parellas d’o mesmo sexo apunta a una victoria d’o “sí” con un refirme de mas d’o 60% d’os votos, con a mayoría d’as mesas escrutadas. O escrutinio ha prencipiau a las diez d’o maitín (hora espanyola) d’iste sabado, dimpués de 15 horas de votación en a chornada previa, marcada por una participación d’entre o 50 y o 60% de l’electorau.

Tasament una hora dimpués d’o comienzo d’o computo d’os sufrachios y a falta de resultaus definitivos, as primeras procheccions indicoron ya que o emparo a o matrimonio homosexual s’imposaba en quasi todas as circumscripcions de Dublín y en as d’as zonas rurals.

En primeras, ista alta participación beneficia a os suyos partidarios, a qui as enqüestas han veniu atorgando entre a campanya una comoda victoria. En as zagueras semanas, manimenos, os sondeus tamién detectoron un abance d’os suyos detractors, asinas como a existencia d’un alto porcentache d’indecisos, quasi un 25 %.

Comparativament, en totz dos zaguers plebiscitos solament un 33 y un 39 % de l’electorau acudió a las urnias ta pronunciar-se en 2012 y 2013, respectivament, sobre a reforma d’a Lei d’o Menor y l’abolición d’o Senau.

A Republica d’Irlanda ya promulgó en 2010 a Lei de Relacions Civils que, por primer vegada en iste país, concedeba reconoixencia legal a las parellas de feito d’o mesmo sexo, pero elude qualificar-las a ixas unions de “matrimonio”.

Con a victoria d’o “sí”, o matrimonio entre parellas d’o mesmo sexo será reconoixiu por l’articlo 41 d’a Carta Magna, o que le concederá protección constitucional y le equiparará a o matrimonio tradicional.

O “Sí, quiero” en un país mayoritariament catolico

Irlanda  “brila” hue en tot o mundo dimpués d’acceptar en referendum a legalización d’o matrimonio homosexual, ha subrayau o ministro irlandés de Sanidat, o conservador Leo Varadkar, o primer miembro d’un Executivo de Dublín ubiertament gai.
Varadkar, qui reveló iste anyo a suya condición d’homosexual, ha asegurau que iste país, encara mayoritariament catolico, vive iste sabado una “chornada historica y muit especial” gracias a o “sí” dau en o plebiscito d’a vispra a la propuesta d’o suyo Gubierno, de coalición entre conservadors y laboristas.

Bella cosa s’ha dispertau dentro d’os irlandeses con iste referendum“. Ta muita chent, ista consulta representó una qüestión personal. Miembros d’a comunidat gai, lesbiana u transexual perteneixen a una minoría, pero gracias a tantos amigos, familiars u companyers de treballo son una mayoría“, ha dito Varadkar.

O ministro de Sanidat ha reiterau que se siente “muit argüelloso” d’estar irlandés por o mensache que l’electorau d’iste país ha ninviau t’o mundo: “Ta yo, no solament ha estau un referendum, ha estau una revolución“.

A ONG pro Dreitos Humanos Human Rights Watch (HRW) ha afirmau que iste”sí” d’Irlanda a favor d’o matrimonio entre personas d’o mesmo sexo, guarenciará a igualdat matrimonial y diminuirá a discriminación contra o colectivo de personas gais, lesbianas, bisexuales y transexuales (LGBT).

“A chent d’Irlanda ha expresau o suyo emparo a o Dreito Fundamental de casar-se entre parellas d’o mesmo sexo”, ha sosteniu o director de HRW t’a esfensa d’os dreitos d’as lesbianas, gais, bisexuales y transexuales, Boris Dittrich. “O voto tamién indica que a mayoría d’os votants irlandeses refusa as tacticas bochornosas d’a oposición”, ha adhibiu.

L’arcebispau irlandés: cal reaccionar a istes cambeos

L’arcebispe de Dublín, Diarmuid Martin, ha afirmau que o “sí” de l’electorau irlandés a o matrimonio homosexual ye un eixemplo d’a “revolución social” que traviesa “dende fa tiempo” iste país y reconoixió que a Ilesia catolica debe reaccionar a istes cambeos. Diarmuid Martin considera que ha plegau o momento que a hierarquía catolica inicie un proceso de profundo debat y de “revisión d’a realidat”.

O maximo dirichent de l’archidiocesi de Dublín ha asegurau que os responsables catolicos han de trobar un “nuevo luengache” ta propagar mas eficazment o mensache d’a Ilesia, mas que mas entre os mas chovens, o voto que ha resultau clau en a consulta sobre o matrimonio entre parellas d’o mesmo sexo.

Mientres a campanya, a Ilesia catolica, emparada por un reduciu numero de grupos conservadors, antialbortistas y una minoría de senadors y diputaus, sostenió que o matrimonio homosexual atenta contra as valors d’a familia tradicional y que modificará radicalment os procesos d’adopción y de maternidat subrogada, de vez que erosionará os dreitos d’o menor.

Fuent: http://www.eldiario.es/sociedad/Irlanda-referendum-legalizar-matrimonio-RTE_0_390911044.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.