O sindicato mayoritario d’a sanidat anuncia atures dende o 24 de setiembre

Medicos y enfermers son convocaus a fer vaca dos semanas.

Concentracion por a sanidat universal (Foto: El Ventano)

Concentracion por a sanidat universal (Foto: El Ventano)

A reunión que bi habió o martes entre o SALUD y os representants d’os treballadors d’a sanidat no podeba rematar con más concaramiento. En salir-ne CEMSATSE, o sindicato mayoritario de medicos y enfermers anunció a convocatoria de un ature de dos semanas que prencipiaría o venient diya 24 y que podría prolargar-se de traza indefinida.  En a primer semana ferían vaca os medicos d’hespitals y en a segunda os facultativos de primaria y enfermería.Atros sindicatos como CC.OO., UGT u CSIF encara no han anunciau si refirmarán ista convocatoria u no, encara que sí amostroron o suyo refús t’as midas que ye prenendo l’administración. Os treballadors d’a sanidat quieren asinas aturar as zaguers midas anunciadas por o SALUD, como enamplar a edar de chubilación, sacar bells complementos d’os chornals, enamplar a chornada laboral u fer que os mayors de 55 anyadas haigan de continar fendo guardias.

Concentración por a sanidat universal

Antimás, a “Plataforma por a Sanidat Universal”, fació ahiere una concentración en a Plaza Espanya de Zaragoza, dende a on que quereban expresar o suyo refús a la mida presa por o gubierno espanyol de deixar sin tarcheta sanitaria a miles de migrants sin papels. Ista plataforna, que arrocla a sindicatos, partius politicos, colectivos socials y asociacions profesionals medicas, denunció que a debandita mida va contra “a declaración d’os dreitos humanos, a constitución espanyola y l’estatuto d’autonomía d’Aragón”.

En o comunicau que se i leyó, acusoron a lo gubierno espanyol d’exercer una “xenofobia institucional” y de “fer periglar a sanidat, en interrumpir-se os mecanismos ta detectar y tractar antis con antis as malotías”.

L’Asambleya ciudadana de Uesca – 15M de Uesca convoca t’o chueves una concentración baixo o mesmo lema “Igualdat ta vivir” a las 20:00 en a Plaza Navarra d’a ciudat.

Una rispuesta a O sindicato mayoritario d’a sanidat anuncia atures dende o 24 de setiembre

  1. Pingback: O sindicato mayoritario d’a sanidat anuncia atures dende o 24 de setiembre | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.