O Supremo rebaixa de nueu anyos a seis meses a condena de Matas, que esquivará a prisión

Tamién rebaixa a pena a o periodista Antoni Alemany. Estioron condenaus por malfurrie de diners publicos y fraude, entre mas delitos

jaume matasO Tribunal Supremo espanyol ha rebaixau a pena de prisión de l’expresident d’o gubierno balear, Jaume Matas, de seis anyos a nueu meses, por o que no habrá d’ir a prisión. O tribunal tamién rebaixa a condena d’o periodista Antoni Alemany, de tres anyos y medio de prisión a dos anyos y tres meses. Totz dos heban estau condenaus en marzo de l’anyo pasau por malfurrie de diners publicos, prevaricación, falsedat documental y fraude a l’administración.

O tribunal absuelve a Matas de fraude a l’administración, falsedat en documento oficial y mercantil y prevaricación en concurso d’un delito continau de malversación. En cambeo, mantiene la condena a nueu meses y un diya de prisión por trafico d’influencias y una pinyora de 6.000 euros. O Supremo tamién rebaixa a condena d’Antoni de Padua Alemany y Joan Martorell.

As condenas inicials

O tribunal d’a sección primera de l’Audiencia de Palma heba condenau Matas a seis anyos y dos diyas de prisión por fraude a l’administración, falsedat documental, prevaricación y trafico d’influencias por haber favoreixiu, mientres yera president, a o periodista Antoni Alemany, pagando-le 480.000 euros d’o tresoro publico d’una traza irregular; Alemany, amás, le heba feito campanya favorable dende as pachinas d’o diario El Mundo. Matas presentó recurso a o Tribunal Supremo, que ha acabau rebaixando as penas d’os prencipals condenaus.

Os motivos d’o Supremo

En o recurso, os advogaus de Matas heban denunciau vulneración d’o dreito de presunción d’inocencia, vulneración d’o dreito de proporcionalidat d’as penas y de tutela chudicial, falta de guarancias procesals, aplicación indebida d’una serie d’articlos y falta de claridat en os feitos que se consideran prebaus, amás de contradiccions entre as prebas y o criterio d’o chuez.

En a sentencia que s’ha feito publica hue, os machistraus d’o Supremo fan constar que belunas d’as afirmacions de l’Audiencia de Palma se basan en suposicions no prou consistents, y por tanto consideran que fa falta que prevaleixca o dreito de presunción d’inocencia. Seguntes os machistraus, en a mida que ‘no concurren rigurosament elementos tipicos integradors d’a figura delictiva’ tal como constan en a lechislación, no se pueden aplicar a Matas as condenas imposadas por istes delitos por parte de l’Audiencia.

Os machistraus aseguran que no se puede considerar que Matas cometese garra delito de prevaricación en os encargos que fació a Alemany y que heban estau obchecto d’o caso Concurso: ‘De garra traza se puede sostener que garra autoridat ni garra funcionario publico hese dictau una resolución arbitraria sabendo que yera inchusta‘. Tamién l’exime d’o delito de malversación: ‘Examinadas as facturas y os libros de pagos, en dengún no amaneixe garra mención d’o 5% que se diz que heba cobrau Nimbus Publicidat en concepto de comisión’.

Tampoco no consideran que pueda estar condenau por fraude a l’administración porque os feitos no s’achustan a ixo que estipula a lei sobre o delito: ista figura delictiva constituye una modalidat d’estafa agravada y, por tanto, han de concurrir-ie elementos que caractericen ista estafa. ‘Puede haber-ie una irregularidat administrativa u mesmo atra figura delictiva diferent, pero de garra traza se i detectan elementos que definen iste delito‘, diz o Supremo.

En cambeo, sí que le mantiene a condena de nueu meses de prisión por trafico d’influencias porque considera prebau que Matas ‘fació servir a suya autoridat hierarquica pa presionar a o Sr. Martorell, con prou entidat pa alterar o proceso de valoración d’a solicitut de subvención realizada por o Sr. Alemany a traviés de l’Achencia Balear de Noticias, con o qual aconsiguió que o Sr. Martorell fese a proposa que determinó a concesión’.

Fuent: http://www.vilaweb.cat/noticia/4135335/20130723/suprem-rebaixa-anys-sis-mesos-condemna-matas-esquivara-preso.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.