O tramvía de Zaragoza ya circula por o norte d’a ciudat

Se completa asinas tot lo recorriu d'a linia 1 d'o tramvía dende Val d'Espartera dica Parque Goya

O tramvia plegando en o Campus Río Ebro

O tramvia plegando en o Campus Río Ebro

Dende as 5:00 d’o maitin d’iste martes, a linia 1, y por agora a unica, d’o tramvía de Zaragoza ya ye funcionando de tot. O tramvía plega asinas dende o vico de Val d’Espartera dica Parque Goya, pasando por l’ACTUR y o Campus Río Ebro. En total, a linia tien 12,8 kilometros de largaria, 25 aturadas y tot lo recorriu se fa en bells 40 minutos.

O tramvía ya levaba iste maitin a os primers viachers por a marguin cucha. Entre ells muitos estudiants que, a la fin, viyen plegar a linia dica o Campus Río Ebro, a on que estudian u treballan bellas 10.000 personas y s’imparten arrienda titols universitarios. Encara que por agora a ocupación ye menor que en l’atra parti d’o trachecto, o que va dende Val d’Espartera dica o centro d’a ciudat, tot pareix indicar que, en que os zaragozanos se i faigan, o tramvía rechistrará ocupacions parellanas.

En o viache de devantadera, que se fació o lunes, l’alcalde Belloch se felicitó por haber-se rematau as obras antis d’o previsto y por l’exito que ye tenendo o tramvía. Sin concretar calendatas, Belloch charró de levar o tramvía t’atros vicos como Sant Chusé, As Fuents u Torrero, encara que reconoixió o gran problema de financiación d’ixas hipoteticas nuevas linias. Tamién s’amostró optimista cuanto a la acullida d’a ciudadanalla y dició a CAF – a constructora d’os tramvías – que ise “pensando en fer-ne de nuevos, porque en caldría a escape.”

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.