O tramvía y a bici desplazan a o coche y fan cayer a emisión de CO2 en Zaragoza

O lanzamiento de dioxido de carbono por o trafico rodau retrocede un 28 % en un decenio, en o que l'uso de turismos ha caito un 31%

O tramvia plegando en o Campus Río Ebro

O tramvía plegando en o Campus Río Ebro

reducción d’o trafico de coches por o centro de Zaragoza como conseqüencia d’o efecto disuasorio d’o tramvía, d’a cheneralización de l’uso d’iste transporte colectivo como complemento y alternativa a l’autobús y d’a creixent utilización d’a bicicleta como medio de desplazamiento urbano prencipian a tener efectos positivos en a calidat de l’aire d’a capital aragonesa: l’uso de vehíclos privaus en o centro s’ha reduciu un 31% en os zaguers diez anyos, seguntes os datos que manulla o concello.

Manimenos, un estudeo d’ISTAS (Instituto Sindical de Treballo, Ambient y Salut, de CCOO) indica que a ciudat sigue suportando diariament a circulación de 144.000 vehíclos, un volumen que ixa entidat considera inasumible.

A tamás d’ixe elevau uso d’o vehíclo privau pa os desplazamientos, as emisions de CO2 relacionadas con o trafico se reducioron un 27% entre 2005 y 2014 en o conchunto de Zaragoza, seguntes sinyala l’inventario realizau por a Fundación Circe ta l’Achencia Municipal de Medio Ambient, que cifra en un 48% a reducción que experimentó en ixe mesmo periodo o lanzamiento de gases residuals relacionaus con o transporte como l’oxido de nitrocheno.

Cayen totz os contaminants relacionaus con o trafico

A mayoría d’os contaminants relacionaus con l’uso de vehíclos se mantenió l’anyo pasau por baixo d’os limites que marca Europa, como ocurrió con os dioxidos de nitrocheno y de xufre, con as particlas solidas en suspensión de diametro inferior a 2,5 micras –cheneradas por a combustión de gasolios en os motors diesel- y con l’ozono troposferico, encara que iste aconsiguió nivels de prealerta en quantas ocasions en as estacions d’As Fuents y de l’avenida Soria.

En ixa millora d’a calidat de l’aire tenió a veyer tamién o menor uso d’o gasolio como combustible pa las calefaccions domesticas. A suya substitución por o gas natural propició en ixe decenio un descenso d’o 8% en a cheneración de CO2, tendencia que se deixa sentir especialment en os barrios de recient creyación como Parque Goya, Valdespartera y Arcosur.

Con tot, l’auto particular sigue estando o medio de transporte mas utilizau por os zaragozanos y zaragozanas en os suyos desplazamientos relacionaus con o treballo.

Mas d’a mitat d’os trachectos laborals, en auto

O estudeo d’ISTAS indica que s’utiliza pa lo 54 % d’ixes trachectos, entre que autobús y tramvía se reparten unatro 27,9 %, a bicicleta ye utilizada por un de cada vint treballadors y bell poquet mas d’un de cada cinco –un 21 %- va y/u viene d’o suyo treballo a piet.

A reducción total d’as emisions de CO2 cheneradas por actividatz humanas en a capital aragonesa entre ixe periodo estió d’o 18%, con o que Zaragoza cumple os nivels de calidat de l’aire que marca a UE pero no os d’a Organización Mundial d’a Salut (OMS).

Eduardo Bayona pa ElDiario.es Aragón.

Fuent: http://www.eldiario.es/aragon/sociedad/desplazan-desploman-emision-CO2-Zaragoza_0_545595663.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.