O tribunal absuelve a totz os acusaus en o chuicio d’o Prestige

O petroler contaminó 2.980 km de costa afectando a 1.037 plachas

Voluntarios treballando en l'accident d'o Prestige (Foto: Eldiario.es)

Voluntarios treballando en l’accident d’o Prestige (Foto: Eldiario.es)

O Tribunal Superior de Chustici de Galicia ha decidiu absolver a lo capitán d’o petroler Prestife, Apostolos Mangouras, y a o suyo chefe de maquinas. O tribunal argumenta la “dificiltat d’atribuyir responsabilidatz precisas” en as circunstancias que bi habió arredol d’a esferra meyoambiental. Seguntes o tribunal, no bi ha datos que permitan establir as causas de l’avería que comprometió a navegabilidat debant d’as costas de Galicia.

O tribunal refirma la decisión d’aluenyar o petroler d’a costa y deixa sin responsabilidatz penals a lo responsable d’ista decisión, qui yera alavez director cheneral de Marina Mercante, José Luis López-Sors, que no tendrá asinas garra responsabilidat penal que podese derivar-se d’a esferra que siguió a la decisión d’aluenyar o petroler d’a costa.

Mangouras nomás ye condenau a una pena de nueu meses, por la que no dentrará en a garchola, por un delito de desobediencia a la autoridat por negar-se a deixar-se remolcar en as horas criticas.

A sentencia por o vulcau d’o Prestige plega once anyadas dimpués d’a marea negra y dimpués de ueito meses d’un chuicio a on que se facioron más de 200 interrogatorios a testigos y peritos.

Reacción dende Greenpeace

Greenpeace considera que a sentencia d’o chuicio d’o Prestige no bi incluye ni a los responsables politicos, ni a las interpresas que i tenioron parti y, alavez, ye una sentencia ta “cubrir l’expedient” que no empachará que bi haiga un atro Prestige. A marea negra que afectó a quasi 2.000 kilometros d’a costa espanyola estió debida, antimás d’as faltas en a responsabilidat en o transporte maritimo que, hue, continan protechendo os intreses d’a industria petrolera, a los fallos y neglichencias institucionals en prener decisions dende que o Prestige fació lo 13 de noviembre de 2002, fa hue 11 anyadas, o sinyal de socorro.

“Iste proceso contrimuestra que os culpables politicos no pagan, que as interpresas culpables no pagan y que no se fa chusticia quan se tracta d’esfender o meyo ambient ni a las personas”, ha declarau Raquel Montón, responsable d’a campanya Energía de Greenpeace Espanya. “Fa 11 anyadas Greenpeace estió testigo en Galicia d’o que pasó con o Prestige. Hue adedicamos os nuestros poders a liberar a 30 companyers engarcholaus en Rusia por denunciar lo mesmo, que os intreses petrolers continan estando más importants que no lo meyo ambient t’os gubiernos y a industria”.

A organización ecolochista insite una vegada más en que a decisión d’aluenyar o barco estió una d’as mayors errors feitas, a información ufierta por as diferents administracions t’a población estió radida, no’n estió prou, y bellas vegadas estió falsa. Que no bi hese una valuración d’a dimensión meyoambiental d’o accident estió a zaguer d’as tres causas principals d’a zaborrera chestión de l’accident d’o Prestige. A isto se suma que a industria petrolera aproveita os recursos ambientals, pero no se fa cargo d’a suya responsabilidat con as conseqüencias derivadas d’a suya actividat economica.

Fuent: http://www.eldiario.es/politica/sentencia-prestige_0_196330492.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.