O Tribunal Constitucional alemán da o visto bueno a o MEDE

En caso contrario, s'hese desatau una crisi politica dificil de controlar t'os socios d'a Unión Europea. A reacción en os mercaus ha estau immediata y a prima espanyola ha baixau de 400

Finalment y dimpués de qualques meses d’aspera, o Tribunal Constitucional alemán ha fallau a favor d’o Mecanismo Europeu d’Estabilidat, o conoixiu MEDE, con o qual se podrán encetar os plans de rescate t’os socios con problemas y gracias a o qual se podrá fer a compra de deuda de países con problemas. Un elemento que a suya validez heba estau mesa en dubda por bells deputaus alemans, que aseguraban que se tractaba d’una ferramienta contraria a la soberania d’os Estaus miembros d’a Unión.

Como yera d’asperar, l’aprobación defintiva s’ha feito con bellas condicions que afectan, prencipalment, a o papel que Alemanya tendrá en iste nuevo sistema: caso que supere os 190.000 millons d’euros, a decisión habrá d’estar ratificada por as dos Camaras d’o Parlamento alemán. Amás, s’imposa a o MEDE un marguin de maniobra cifrau en 700.000 millons d’euros.

Asinas l’ha dictaminau l’alto tribunal alemán que, por meyo d’o suyo president Andreas VossKühle, ha dau a luz verda necesaria ta que o Banco Central Europeu prencipie decamín a compra de deuda soberana que podría rescatar de forma defintiva a Espanya y Italia. Ta que o MEDE tienga validez oficial, agora ye o redolín d’o president d’a Republica Alemana, Joachim Gauck, que habrá de sinyar o documento, o mesmo que succede con o Pacto Fiscal.

Con ista aprebación, s’ha evitau una important crisi en o sino d’a Unión Europea. En caso de no producir-se, a canciller Angela Merkel hese estau en una crucillata important ya que hese visto cuestionada a suya politica europea y mesmo podría haber habiu de convocar eleccions. “Si o MEDE fracasa, Europa puede dentrar en una crisi financiera con conseqüencias enormes y alavez o Tribunal Constitucional perderá a suya lechitimidat democratica”, aseguraba horas antes Daniel Cohn-Bendit, lider d’o grupo parlamentario en o Parlamento Europeu d’os Verdes a o diario L’Economista.

Fuent: http://www.aragon2.com/n-20194-503-Tribunal_Constitucional_aleman_visto_bueno_MEDE

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.