O Tribunal Constitucional portugués declara ilegal parte d’os retalles

A retirada d'a paga extra ta funcionarios y pensionistas y a rebaixa d'os subsidios d'ature y malotías son consideraus ilegals por o Tribunal Constitucional portugués

Passos Coelho - Durao Barroso

Passos Coelho conversa con Durao Barroso. Foto: Partiu Popular Europeu

O Gubierno portugués ha recibiu un fuerte truco de mans d’o Tribunal Constitucional d’o país en declarar ilegals bellas partes d’as midas d’austeridat aprebadas. O Constitucional ha declarau ilegals a retirada d’a paga extra t’os funcionarios y pensionistas y as rebaixas en o subsidio d’ature y malotías aprebadas en o presupuesto ta iste anyo. O Tribunal considera que se viola o prencipio d’igualdat en os sacrificios economicos a fer. Manimenos a puyada d’impuestos sí que l’ha considerau acorde a la Constitución.

O gubierno liderau por o Primer Ministro Pedro Passos Coelho se troba en una dificil situación, presionau por a Troika con as suyas midas d’austeridat y por as protestas d’o pueblo portugués, en contra d’os retalles. Agora o gubierno de Passos Coelho habrá de refer as cuentas ta consiguir estalbiar os diners que le caldrán ta cumplir con a sentencia.

S’aspera una crisi de gubierno dimpués d’a dimisión d’o ministro d’Afers Parlamentarios, Miguel Relvas, un d’os miembros fuertes d’o gubierno de Passos Coelho, acusau de fraude en una carrera universitaria y ista sentencia constitucional que lo podría levar enta una reestructuración urchent. O Primer Ministro ha convocau un consello de ministros extraordinario ta ista mesma tardi.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.