O Tribunal d’Estrasburgo condena Espanya por as torturas a Martxelo Otamendi

Deplora que l'estau no investigase as denuncias de tortura d'o periodista quan tracoron Egunkaria

Martxelo Otamendi (Foto: Wikipedia)

Martxelo Otamendi (Foto: Wikipedia)

O Tribunal Europeu d’os Dreitos Humans ha condenau (sentencia) a l’estau espanyol a pagar una indemnización de 24.000 euros a o director de Berria y ex-director d’Egunkaria, Martxelo Otamendi, por no haber investigau as torturas que sufrió mientres a detención o 2003, de man d’a guardia civil. A sección tercera d’o tribunal concluye que Espanya vulneró l’articlo 3 d’a Convención Europea de Dreitos Humans, que proclama o dreito de no sufrir tracto degradant u inhuman.

O periodista estió deteniu o febrer de 2003 en casa suya por orden de l’Audiencia Nacional espanyola, que l’acusaba d’o delito de perteneixer a banda armada chunto con os periodistas y ex-directivos d’Egunkaria Joan Mari Torrealdai, Iñaki Uria, Txema Auzmendi y Xabier Oleaga. Totz ells estioron absueltos d’ista acusación por l’Audiencia espanyola mesma fa dos anyadas.

Pasó cinco diyas incomunicau, mientres que estió torturau, seguntes denunció dimpués de quedar en libertat. A denuncia estió archivada por as instancias chudicials espanyolas. Estió alavez quan Otamendi recurrió a Estrasburgo, a on que denunció que o proceso chudicial y a investigación en Espanya heban estau sin prous guarancias y, alavez, heba sufriu indefensión.

A sentencia d’ahiere d’Estrasburgo remera os feitos denunciaus por Otamendi y explica que o medico forense l’examinó dica quatre vegadas mientres a detención os diyas 20, 21, 22 y 23 de febrer de 2003. Con tot y con ixo, en os informes, o chuez dició que o periodista s’heba negau a estar examinau. Quan Otamendi estió debant d’o chuez, “declaró que heba estau obcheto d’abusos mientres a detención”, diz a sentencia, que reconta as torturas denunciadas por Otamendi, como haber estau quillau mientres diez horas, remanir dispiesto mientres dos diyas, recibir faltadas homofobicas, estar espullau y obligau a adoptar una posición sexual, que le heban meso un obcheto de metal en o tozuelo que fació un rudio parellano a lo d’o esclatiu d’una pistola, que heba estau cubierto dos vegadas o tozuelo suyo con una bolsa de plastico y que estió menazau de muerte. “En estar liberau, o demandant denunció os abusos. O chuez lo refusó, alegando secreto de investigación”.

Continoron os recursos dica plegar en o Tribunal Europeu de Dreitos Humans, que ahiere le dio a razón y condena a Espanya por no haber feito lo que caleba y no haber investigau as denuncias.

 

Fuent: http://www.vilaweb.cat/noticia/4047620/20121016/tribunal-destrasburg-condemna-espanya-tortures-martxelo-otamendi.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.