O Tribunal Supremo confirma l’anulación de l’entibo de Mularroya

As obras aturarán entre que a CHE para una nueva Declaración d'Impacto Ambiental. Os opositors se felicitan por a sentencia y demandan que no se faiga la obra

Protesta d'a Plataforma Jalón Vivo

Protesta d’a Plataforma Jalón Vivo

O Tribunal Supremo ha confirmau iste lunes l’anulación de l’entibo de Mularroya, en no trobar que bi ha prous midas ta guaranciar a conservación d’o patrimonio meyo ambiental afectau por a construcción de l’entibo. Confirma asinas a sentencia dictada por l’Audiencia Nacional espanyola en 2009 que anulaba o prochecto y a suya Declaración d’Impacto Ambiental (DIA). As obras, que continaban dica hue, aturarán de camín, seguntes a CHE.

As dos instancias han considerau “manifiestas y evidents” as deficiencias en a debandita DIA y que no se guaranciaba que o prochecto no metese en periglo as ZEPAs (Zona d’Especial Protección d’Aus) y LICs (Puesto d’Intrés Comunitario) d’a redolada. A tamás d’a sentencia de l’Audiencia Nacional espanyola, as obras han continau dica hue. A nueva sentencia diz que “ni se ha acreditau que sigamos debant de razons imperiosas d’intrés publico de primer orden, ni s’han preso quantas midas compensatorias calga ta guaranciar que a coderencia global de Natura 2000 quede protechida”. As costas chudicials, de más de 6.000 euros, las habrán de pagar l’Advogau de l’EStau y a Chunta Central d’Usuarios d’o Xalón, qui heban recurriu l’anterior sentencia.

As reaccions no han tardau mica. Dende a Plataforma Jalón Vivo, COAGRET, Ecologistas en Acción y SEO-Birdlife, s’han felicitau por a noticia y han demandau que s’aturasen a l’inte as obras en l’entibo y remeran que “agora istas obras son ilegals”. En os venients diyas valurarán si levar una queixa t’a Unión Europea por l’incumplimiento de l’Estau espanyol d’a normativa europea en continar con unas obras sin Declaración d’Impacto Ambiental valida.

Puyalón de Cuchas, partiu que s’ha oposau de siempre a l’entibo de Mularroya, ha felicitau a totz os opositors a l’entibo. Zesar Corella, o suyo coordinador nacional creye que “a sentencia deixa en evidencia” a totz os partius con representación en Cortes qui “han refirmau un entibo que s’ha blincau toda mena de lechislación meyoambiental“.

A Confederación Hidrografica de l’Ebro, d’atra man, ha anunciau que aturará as obras de l’entibo en conoixer-se a sentencia. Manimenos, tamién dito que se ye treballando en midas correctoras ta fer una nueva Declaración d’Impacto Ambiental que pueda fer continar as obras y o prochecto.

O entibo de Mularroya tien un presupuesto de más de 150 millons d’euros y pende en quatre actuacions: un azute d’esbarre en o Exalón, un tunel de trasvase dende Calatayu dica Morata, a paret de l’entibo en o río Griu y as variants d’as carreteras N-IIa y A-2302. Agora mesmo, seguntes a CHE, ye executau en un 33%, encara que a paret de l’entibo va por o 62%. As auguas que entibaría teoricament habrían de ruixiar tierras de Val de Xalón. En a suya redolada se pueden trobar animals y plantas protechidas de diferents trazas, como os moriciegos, vueitres, loiras u alicas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.