O Tribunal Supremo reduce as condenas por o “caso Bateragune”

O Tribunal Supremo espanyol reduce as penas de garchola de 10 a 6 anyos y medio a Otegi y Díaz y de 8 a 6 anyos t'a resta d'os cinco condenaus.

O Tribunal Supremo espanyol ha comunicau hue a resolución d’os recursos interpuestos por a esfensa d’os condenaus por l’Audiencia Nacional por o “caso Bateragune” Arnaldo Otegi, Rafa Díez, Arkaitz Rodríguez, Sonia Jacinto y Miren Zabaleta. En o caso d’os dos primers ha rebaixau a condena dende diez a seis anyos y medio de prisión, mientres a la resta les ha reduciu a condena de ueito a seis anyos. Os militants abertzales son engarcholaus dende octubre de 2009.

O Tribunal Supremo contina considerando a Otegi y Díaz como integrants de banda armada, pero no como dirichents, en no considerar-lo acreditau. O Supremo advierte que no dentra en valurar a situación actual de debat politico y estratechico en a cucha abertzale, pues no ye l’obchectivo d’o chuicio y refirma a tesi de l’Audiencia Nacional ta condenar a os acusaus por pertenencia a banda armada.

Manimenos, i ha habiu dos votos particulars contra ista sentencia. Uno d’ells, d’o machistrau Alberto Jorge Barreiro, que advogaba por l’absolución d’os cinco condenaus por no considerar probau que os acusaus seguisen ordens d’ETA ni perteneixesen a la mesma. L’atro voto particular, d’o machistrau Miguel Colmenero, ponent d’a sentencia, consideraba que se debeba de repetir o chuicio en l’Audiencia Nacional con un tribunal esferent.

As reaccions no s’han feito asperar. A cucha abertzale por medio de Pernando Barrena y Maribi Ugarteburu, considera a sentencia “escandalosa y inacceptable”, considerando que se ye castigando a qui preba d’encetar un proceso de paz y son fendo un cambeo politico y social en a sociedat vasca. Asinas mesmo, consideran que l’Estau espanyol amuestra febleza y incapacidat politica. De traza parellana s’han expresau os sindicatos vascos ELA y LAB, asinas como tamién amuestran a suya indignación os partius politicos EA, Alternatiba, Aralar y Ezker Anitza-IU.

O Gubierno Vasco ha declarau que acata y respecta a sentencia tanto “quan o conteniu d’as sentencias sintonizan con a opinión d’o Gubierno, como quan considera que istas pueden no estar entendidas por gran parti d’a sociedat vasca”.

Urkullu, d’o PNV, considera a sentencia un “sinsentiu” y que le resulta dificil de respectar as sentencias y a independencia chudicial en vista d’o fallo d’o Tribunal Supremo espanyol.

Por parti d’o PP, Antonio Basagoiti ha manifestau que si condenan a Otegi “a seis anyos ye que se lo mereixe”, asinas como que Otegi no podrá estar candidato a lehendakari en as venients eleccions vascas, pues saldrá d’a garchola en 2016. Por a suya parti, Mariano Rajoy nomás ha comentau que “respecta y acata” a sentencia.

Sentencia y votos particulars.

Una rispuesta a O Tribunal Supremo reduce as condenas por o “caso Bateragune”

  1. A pesar de uqe el contenido de la información está muy bien, pienso que el titular de la noticia no explica esta noticia.
    Por otro lado, recomiendo para su lectura la carta que desde la cárcel ha enviado Arnaldo Otegui. Se puede encontrar en GARA.
    Entalto Arnaldo. Gora la lucha del pueblo trabajador vasco.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.