O Tribunal Supremo suspende quatro articlos d’o reglamento d’os CIE

Sos Racismo, Andalucía Acoge y l'Asociación Pro Derechos Humanos solicitoron a eliminación de ueito articlos d'a normativa, aprebada en marzo

Siede d'o Tribunal Supremo espanyol. Foto: FDV (CC-BY-SA 3.0)

Siede d’o Tribunal Supremo espanyol. Foto: FDV (CC-BY-SA 3.0)

O Tribunal Supremo espanyol ha suspendiu quatro articlos d’o reglamento que riche o funcionamiento d’os Centros d’Internamiento pa Extranchers (CIE), aprebau o pasau mes de marzo, por entender que incumple a Lei d’Extranchería y a normativa europea. En concreto, os machistraus exichen o endurecimiento d’os supuestos en que se permiten os cacheus en coritatis y eliminan a deseparación d’as familias en modulos independients pa mantener a suya intimidat y a posibilidat de solicitar nuevos ingresos d’una mesma persona baixo una mesma orden d’expulsión.

O Pleno d’a Sala Tercera ha alcordau l’admisión parcial d’os recursos d’as ONG Sos Racismo, Federación Andalucía Acoge y l’Asociación Pro Derechos Humanos contra o reglamento de funcionamiento y rechimen interior d’os Centros d’Internamiento d’Extranchers. Manimenos, os machistraus no han acceptau a impugnación d’atros articlos como o que estipula que os policías que fan servicio en os CIE, por regla cheneral, han de portar as suyas armas de fuego reglamentarias u aquell que permite os internamientos “d’emerchencia” en centros “d’ingreso temporal” diferents a os CIE.

Dos d’os articlos cancelaus fan referencia a la intimidat d’as familias internadas. O reglamento, en os suyos articlos 7.3 y 16.2, no guarenciaba a deseparación en modulos diferents d’as familias, una cosa a la que obliga a normativa europea, seguntes entiende a Sala Tercera d’o Tribunal. L’apartau cancelau aseguraba que “se procurará, en a mida d’o posible, guarenciar a unidat y intimidat familiar” quan s’interna a una familia con fillos menors con a intención de solicitar a suya expulsión d’o país. Os denunciants entendeban que “con base en a directiva de retorno ista agrupación familiar ye obligatoria, en un mesmo espacio, o que o reglamento no guarencia explicitament”. O Supremo les ha dau a razón.

O Gubierno tamién habrá d’eliminar l’articlo 21.3, que permitiba “un nuevo internamiento de l’extranchero, por as mesmas causas que determinoron l’internamiento anterior, quan habendo ingresau con anterioridat no hese compliu o plazo maximo de sixanta días, por o periodo que resta dica complir este”. Seguntes han entendiu a mayoría d’os machistraus, “ye contrario a la Lei d’Extranchería, que no permite un nuevo ingreso por qualsiquiera d’as causas previstas en un mesmo expedient d’expulsión”.

Finalment, o Tribunal Supremo ha rebaixau a facilidat pa cachear a os internos de tot espullaus. O reglamento permitiba, en o suyo articlo 55.2, que “en situacions excepcionals, y quan calga pa guarenciar a seguranza d’o centro u existan motivos racionalment fundaus pa creyer que l’interno podese amagar obchectos u substancias prohibidas u no autorizadas, se podrá realizar o rechistro personal d’o mesmo, mesmo con espullau integral si fuese indispensable”.

Os machistraus entienden “que s’excede d’a propia Lei d’Extranchería y d’a churisprudencia d’o Tribunal Constitucional”. Seguntes consideran, istas practicas serían posibles solament si ocurrisen totz dos requisitos citaus (razons de seguranza y motivos fundaus pa creyer que l’interno amagase obchectos prohibius) y no, como determinaba a normativa, tant solament un de totz dos. “Totz dos supuestos –seguntes os chueces– habrían d’estar concurrents”.

Fuent: http://www.eldiario.es/desalambre/Supremo-reglamento-CIE-Ley-Extranjeria_0_350316044.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.