O vico d’A Madalena ‘prene as carreras’ en as suyas fiestas

Se fan 25 anyadas dende a primer Semana cultural d'o vico

cartelO vico zaragozano d’A Madalena prencipia ista tardi as suyas fiestas, fendo o 25eno cabo d’anyo d’a primer edición d’a suya Semana Cultural. O lema esleixiu ye ’25 anyadas prenendo as carreras’ y ixo ye lo que se ferán mientres os venients diez diyas, pues buena parti d’as actividatz se ferán en as carreras d’o vico.

Iste mesmo viernes una actividat de creyación artistica, dos presentacions de libros, una exposición y a ueitena edición d’o ya tradicional Cross de nueitz son beluns d’os actos que se i ferán. Dica o domingo 24 continarán fendo-se as más de 100 actividatz programadas por as más de 60 entidatz que organizan as fiestas, más que más, comercios y teixiu asociativo.

Entre as actividatz programadas bi ha de tot. Muita virolla, pues antimás de socalces u brendas organizadas por as asociacions con siede en o vico u os hostelers, totz os diyas se fan chentas populars, siempre con opción vechetariana ta qui quiera amanar-se-ie. O pre d’as chentas ye de 4 euros y se convida a la chent a portiar a suya vaixiella ta mirar de no malfurriar materials y fer d’as fiestas un evento ecolochico y sostenible. A mosica tamién i será bien present. O sabado 16 Esne Beltza, Batikano Rojo y Groove’s Barrel levarán a borina t’a Plaza Sant Agustín. China chana serán os encargaus d’amenizar a chera la venient nueit de Sant Chuan, o sabado 23. Muitas atras collas y dj’s actuarán en bars, locals y plazas.

Pero probablement as dos fitas que más chent i arrocla, u que más trucan o ficacio, son a Ciclonudista y a chera de Sant Chuan. En a primer, cientos de personas espulladas pedalean por a ciudat reivindicando as carreras y as bicis en un ambient festivo. O diya de Sant Chuan, en ista anyada, rebute d’actos en cayer en sabado. Mientres tot lo diya bi habrá actividatz t’a catrinalla y os adultos en o Parque Bruil que rematarán pretando-le fuego a la chera a on que cadagún cremará os suyos deseyos -u ferá a suya cena-.

A Madalena contina asinas con as suyas fiestas, siempre reivindicando valors como a participación, l’autochestión u a ecolochía. O programa completo se puet descargar en a web d’as fiestas.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.