O zarre furtivo d’un trescole entorna caudal a o río Matarranya

Dimpués d'as zagueras plevias, iste río pareixe recuperar a suya actividat normal, una situación que ha estau posible tamién gracias a o zarre d'una instalación que ha dau muito que charrar en a zona

Os Molins de Bezeit. Foto: José Luis Mieza

O río Matarranya en a suya cabecera, en Bezeit (Teruel), fa días que ha prencipiau a normalizar o suyo cauz, que amaneixeba penosament xuco en diversos tramos d’o suyo curso alto dende feba meses. As plevias d’as zagueras semanas caitas en a zona dimpués de meses de sequera pareixeban estar dezaga d’ixa recuperación, vital t’a pervivencia d’un d’os ecosistemas fluvials millor conservaus d’Europa, pero o caso ye que o “zarre” d’una obra hidraulica ha teniu muito a veyer con a rapeda normalización d’o caudal: o pasau 17 de noviembre, yera zarrada a zaguera d’as talladeras d’o trescole que, por un sistema d’azute y tunel de gravedat, deriva l’augua dende o Matarranya dica l’entibo de Pena; os candaus y cadenas que aseguraban a zaguera enforcadura d’o sistema son tiraus en a glera d’a canalización, probablement dimpués d’haber estau forzaus u trencaus.

Se da a circumstancia que fa pocos días, diversos vecins de Bezeit creyoron y comentoron una galería fotografica en Facebook ta denunciar o que ta ells tien a prencipal culpa d’a persistent sequera d’o Matarranya en diversos tramos d’a suya cabecera: os citaus azute y trescole, una obra que istos bezeitanos qualificaban d’inchusta y ilegal “por no respectar o caudal ecolochico d’o río”. Acusación a la que a Confederación Hidrografica de l’Ebro (CHE), dimpués de conversacions con meyos como Heraldo de Aragón y Diario de Teruel, pareixeba no dar credito, si bien s’amostraba ubierta a estudiar l’estau actual d’a obra. A publicación d’a problematica en os retz socials no estió soque a zaguera denuncia d’una queixa que leva meses en bocas y carreras de Bezeit: l’aprecisada falta d’augua en tramos altos d’o Matarranya y en qualques d’as suyas fuents y cequias derivadas, un liquido que sí yera disponible ta trescolar-lo ta l’entibo que os suyos prencipals beneficiarios son os regants d’a cuenca baixa d’o río, mas que mas os propietarios de frutals de presiego de Maella (Zaragoza).

Agora, belún pareixe haber optau por feitos en cuenta de parolas ta tornar a o río o que ye suyo, en zarrar a zaguera d’as talladeras que sacaba l’augua a o teruelano afluent de l’Ebro y privaba a especies en periglo d’acotole como o cangreixo y a truita autoctonos y o barbol culirroyo, entre atras, de circular librement por o cauz alto y de reproducir con normalidat. Amás de provocar a disminución y perda de biodiversidat, a falta de caudal fluvial deixa tamién sin augua a os usuarios de cequias como a historica d’a Vall d’o Prat (Val d’o Prau, antes mas famosa por a suya fertilidat agricola), qui fa meses que no pueden regar os suyos chicotz hortals y frutals.

Trescoles polemicos y man d’obra africana

O polemico trescole de caudals dende a cabecera d’o Matarranya dica l’entibo de Pena lo construyó a CHE en os anyos 70 d’o sieglo XX, en una zona d’altisma valor meyoambiental; a suya primer fase concluyó en 1978, dimpués de devantar un azute y foradar un tunel dende una cota de 650 m., en o río, dica l’entibo, que a suya mayor altitut aconsigue os 632 m. O grueso d’a penosidat laboral d’ista canalización la executoron a pico y pala beluns d’os operarios de l’archipielago africano de Cabo Verde que plegaban de rematar a construcción d’a central termica d’Andorra (Teruel), y que a suya plegada en l’Estau espanyol corrió paralela a la fin d’o conflicto belico y social que desembocaría en a independencia caboverdiana d’a suya potencia colonizadora, Portugal (1975).

Enta cabo d’o decenio d’os 90, o conflicto entre a cuenca alta y a baixa d’o río s’agudizó con a construcción, por parte d’a CHE, d’un segundo trescole en Bezeit: un bombeu por elevación en a confluyencia d’o Matarranya con o suyo afluent prencipal, l’Ulldemó –bombeu que quedaría inutilizau por acción d’a naturaleza con a gran creixida d’octubre de 2000-. Ye en ista epoca (1997) quan estudios como os elaboraus por Pedro Arrojo –Premio Goldman ‘Europa’ 2003, primer espanyol galardonau con os consideraus Premios Nobel meyoambientals- y atros qualifican o tunel de derivación Matarranya-Pena de 1978 como “obra sobredimensionada y en gran parte inutil”. Con tot y con ixo, en os suyos primers tres decenios, l’azute que derivaba caudals d’o Matarranya t’o tunel, y d’iste ta l’entibo, deixaba una chicota marguin a la libre circulación d’o río. Pero en 2008, a CHE decidió de reformar a obra y recreixer y zarrar de tot l’azute, con o que a regulación d’o río en ista zona queda sucheta a la voluntat d’ubrir y zarrar con un sistema de talladeras o volumen d’augua, enforcau entre a endrecera ta l’entibo de Pena y a endrecera t’o río. Y os vecins de Bezeit vienen denunciando en privau que dende 2008 os caudals han circulau quasi exclusivament enta l’entibo, y que solament han blincau a barrera de l’azute en as grans y radidismas creixidas. Una situación que s’agrava quan as sequeras empachan l’aporte de barranqueras situadas auguas abaixo d’o trescole, como os “Borrás” y “Les Marrades”, entre atros.

Sin dubda, o calentamiento global y o cambeo climatico, con continas y largas sequeras en o zaguer decenio, son fendo estrozas en zonas como Bezeit y os suyos ríos, de fuerte component mediterranio, con freqüents estiaches y ocasionals creixidas cada vegada mas espaciadas en o tiempo. En l’actual epoca d’escasez hidrica, a lechitimidat d’os bezeitanos por preservar -con respecto meyoambiental y emplegos racionals y sostenibles- un d’os ecosistemas fluvials mas ricos y frachils d’a Peninsula Iberica choca con os intreses productivos d’os regants d’a cuenca baixa matarranyenenca. O dilema tien dos opcions: considerar os minimos d’augua que circulan por a singular cabecera d’un cauz fluvial como patrimonio d’a naturaleza, isto ye, de toda a humanidat, u, por contra, continar fendo servir a escasez aquatica en esquimen de qui creyan y ixamplan regadíos extensivos en zonas de secano, baixo os bateauguas seculars d’a influencia economica y a connivencia politica y gubernamental.

Fuent: http://www.aragon2.com/n-20446-702-cierre_furtivo_trasvase_devuelve_caudal_Matarrana

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.