Obama: “As midas d’Europa contra la crisi no han estau rapedas”

As midas d’os liders europeus ta enfrontar a crisi d’a deuda “no han estau tot lo rapedas que habrían”, afirmó iste lunes o President estaunitense, Barack Obama, qui consideró que ista situación “ye asustando a o mundo”. En una trobada de votants a traviés d’Internet dende Silicon Valley, California, Obama aseguró que en Europa “nunca no se recuperón de tot d’a crisi en 2007 y nunca no resolvión de tot totz os desafíos que o suyo sistema bancario concaraba”.

A crisi, adhibió, s’ha visto agravada per os acontecimientos en Grecia, an que os mercaus temen que iste país plegue en declarar-se en bancarrota. Per ixo, Europa “ye en una crisi financiera que ye asustando a o mundo”, seguntes o mandatario estaunitense. “Preban d’adoptar midas responsables, pero istas midas no han estau tot lo rapedas que habrían”, explanicó Obama, que se lamentó de que en parti debiu a la crisi en Europa y a la puyada d’os pres d’a enerchía per os debantamientos en Oriente Meyo, “as economías de tot lo mundo no creixen tan rapedo como no habrían”.

As declaracions d’o President estaunitense se producen entre medranas d’una suspensión de pagos de Grecia y l’efecto dominó que prevocaría una quiebra en toda l’aria euro. Os inspectors d’a “troika” -formada per o Fundo Monetario Internacional (FMI), o Banco Central Europeu (BCE) y a Comisión Euoprea (CE)- que pretendeban tornar iste mesmo lunes t’Atenas ta reanudar a cinquena revisión d’o programa d’aduyas a Grecia, retrasón a suya vesita, seguntes a Comisión.

Y, encara que tornaran ista mesma semana a la capital griega, a CE descarta ya que a euroaria pueda decidir sobre o desembolso d’o seiseno tramo de l’ayuda -8.000 milions d’euros- o venient 3 d’otubre, quand se trobará en Luxemburgo de nuevo a Eurocolla. Ista semana tamién varios parlamentos nacionals, entre éls l’alemán, habrán de pronunciar-se sobre o Fondo Europeu d’Estabilidat Financiera (FEEF), o gran traste d’a Unión Europea contra la crisi.

En as suyas declaracions d’o lunes, o President no repitió los suyos comentarios de fa dos semanas, quand en una maya redonda con meyos de parlache hispano indicó que un d’os problemas en l’aria euro ye a esferent politica fiscal d’os países d’a rechión. Allora, afirmó que “a la fin os países grands en Europa, os liders en Europa, habrán de reunir-se y prener una decisión sobre cómo pueden fer de conchuntas a integración monetaria con un conchunto más efectivo de politicas fiscals coordinadas”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.