Obama diz que ‘si cal’ no dubdará en recurrir a la fuerza contra Irán

O president d'os EE.UU. tamién esfiende mantener a vía diplomatica ta resolver a crisi nuclear con Teherán.

Barack Obama (Foto: Biquipedia)

O president norteamericán Barack Obama ha esfendiu una solución diplomatica a la crisi actual sobre o programa nuclear iraní, pero ha avisau que no dubdará en fer servir a fuerza, “si cal”, ta esfender os EE.UU. y os suyos intreses. En o discurso anual debant d’o American Israel Public Affairs Committee (AIPAC), o prencipal lobby pro israelí en os EE.UU., Obama ha destacau que Irán “encara ye a tiempo d’eslechir a vía diplomatica ta resolver a crisi nuclear” y ha esfendiu mantener a vía diplomatica y a politica de sancións con Teherán. O president norteamericán s’ha de trobar manyana con o primer ministro d’Israel, Benjamin Netanyahu, que visita os EE.UU.

“‘Creigo firmement que encara i hai espacio t’a diplomacia, acompanyada d’una cierta presión, ta resolver ista crisi. Os EE.UU. y Israel afirman conchuntament que Irán encara no disposa d’arma nuclear, y cosiramos d’amán o suyo programa”. Tamién ha dito que os EE.UU. no renuncian a garra opción ta impedir que Irán desembolique u adquiera una arma nuclear. “Todas as opcions son dencima a mesa’, ha explicotiau, incluyida “l’aición militar”.

 

Medalla Presidencial d’a Libertat a Simon Peres

O president norteamericán ha anunciau en a mesma intervención en a AIPAC que concederá a o suyo homologo israelí, Simon Peres, a Medalla Presidencial d’a Libertat, o mérito civil mas important que atorga o suyo gubierno. A mención s’instauró en 1963 y s’atorga a personalidatz de tot lo mundo por a suya excelencia en os ambitos cultural, economico, esportivo y politico.

Fuent: http://www.vilaweb.cat/noticia/3991737/20120304/obama-diu-cal-dubtara-recorrer-forca-liran.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.