Obama gana sin dificultatz

A victoria d'o president en Florida desfa o plan de Romney y asegura t'os democratas a Casa Blanca mientres quatre anyadas más

Barack Obama (Foto: Wael Attili)

Barack Obama (Foto: Wael Attili)

Pareixeba que sería más dificil pero Barack Obama ha conseguiu a reelección como president d’os Estaus Unius sin sufrir guaire. A nueit electoral ye estada marcada por una baralla epica en Florida, un estau a on que a Mitt Romney le caleba ganar y que encara no ye esclater de que canto cayerá. A posible victoria d’Obama en Florida deixaba quasi sin opcions a o candidato republicano qui, a tamás de conseguir un gran voto popular no ha puesto ganar en o Colechio Electoral. Pero a las seis d’o maitin, hora central europea, as televisions ya proclamoron a victoria d’Obama antis de no saber o resultau final de Florida.

Os republicanos mantienen a cambra de representants

A unica mala noticia d’a  nueit t’o president d’Estaus Unius ye estada que os republicans han manteniu o control d’a Cambra de Representants, asinas que continará tenendo muitos problemas ta gubernar. O Senau, como yera previsto tamién, ha quedau en mans d’os democratas.

As eleccions han tornau a fer vistero como de trestallau en terminos politicos ye o país. Practicament no bi ha habiu sorpresas y os territorios azuls y royos s’han comportau por un regular como s’asperaba. Romney, y ista ye probablement una d’as razons d’a suya redota, no ha conseguiu plegar dillá d’a base politica republicana. Obama, d’a suya man ha quitau treslada, como agora en fa quatre anyadas, d’o voto choven, d’o voto urbano y d’o voto d’as minorías, más que más, d’os afro-americanos, pero tamién d’os hispanos.

Fuent: http://www.vilaweb.cat/noticia/4053274/20121107/obama-guanya-sense-patir.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.