Obrint Pas, Aspencat u Els Catarres, entre atros, en o XXXV Aplec dels Ports

O festival comarcal, que se celebra estianyo en Morella (País Valenciano) plega en a suya XXXV edición y aspera más de 15.000 asistents.

cartelA cuenta entazaga t’a celebración d’a XXXV edición de l’Aplec dels Ports ha prencipiau. A presentación d’ista gran fiesta comarcal se fació o pasau diya 15 en o concello de Morella, lugar que será siede estianyo d’o festival. Os organizadors asperan a plegada de bellas 15.000 personas entre os diyas 25 y 28 de chuliol y anuncian un programa “prou amplo que apuesta por a barracha de grans actuacions, con actos ta totz os publicos”.

Totz os actos serán en o lugar de Morella, espardius por as suyas carreras y plazas. Antimás se bi instalará una zona d’acampada con bar y duchas.

Entre as collas, os organizadors afirman que “s’ha feito un programa completo, pero achustau a los tiempos actuals. Destacan collas como Txarango, Els Catarres, Obrint Pas, Orxata Sound System  u Aspencat. Antimás, mientres o festival se ferá a devantadera de dos exposicions: “Mulra del País Valencià. 2013, any Estellés” y “35 anys d’Aplec”. Tamién bi habrá tiempo t’a reivindicación y o teatro de critica politica, con l’actuación de Xavi Castello. A comisión organizadera explicó tamién en a presentación os exes d’as suyas reivindicacions, como son a oposición t’o fracking, as milloras sanitarias, una eduación publica y de calidat u la millora de conexions en a redolada”. Istas exichencias se ferán visteras en a concentración reivindicativa “Tots per la Comarca. Ací i ara”.

Os organizadors tamién clamoron a l’aduya  d’os ciudadans: “sin vusatros l’Aplec no ye posible“, demandaban ta clamara a lo vecinamen a que participase en totz os actos y que se i apuntasen de voluntarios ta poder coordinar totz os dispositivos.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.