ONG denuncia que 4.000 treballadors morirán en as obras d’o mundial de Qatar

As precarias condicions de seguranza d'os treballadors d'a construcción serían o prencipal motivo.

Maqueta d'o stadium Lusail t'o mundial de Qatar 2022

Maqueta d’o stadium Lusail t’o mundial de Qatar 2022

Bells 4.000 treballadors habrán muerto quan concluigan as obras de construcción d’os stadiums y instalacions que acullirán o Mundial de Futbol de Qatar en l’anyo 2022, seguntes os calculos d’un estudeo d’a ONG Comité de Coordinación t’os Emmigrants Nepalis a los quals ha teniu acceso o diario The Guardian.

Seguntes asegura en a suya edición o periodico anglés, o motivo son as precarias condicions de seguranza d’os treballadors d’a construcción y que os immigrants nepalís viven amuntonaus en aloches insalubres sin aire acondicionau y con sistema d’alcantarillau sobreixiu. Beluns d’istes campamentos de immigrants no tienen sisquiera  suministro electrico ni augua corrient.

De feito, seguntes dita ONG, dende l’encieto d’as obras ya habrían muerto un total de 400 treballadors procedents de Nepal. Solo que l’anyo pasau ya murioron 165 treballadors d’a construcción d’ixe país. En o suyo reportache, publicau en o suplemento dominical, The Observer, se conta o caso d’un choven de 23 anyos que morió oficialment por un “infarto cardiaco repentin”, encara que as fotografías d’o calavre amuestran que o suyo peito yera fundiu, conseqüencia probable d’os maltratos padeixius.

O pasau mes de noviembre Amnistía Internacional publicó un informe en o qual denunciaba as malas condicions sanitarias y de seguranza ta istes treballadors, que en qualques casos ni sisquiera les ne proporcionan de cascos ta treballar en as obras. De feito, mas d’un milar de treballadors han estau ingresaus por caitas en obras en o prencipal hespital de Doha en os zaguers tres anyos.

Os nepalís suposan un 20 por ciento d’a población activa de Qatar, país que conta con importants minorías d’atros países asiaticos como a India, Bangladesh, Pakistán u Sri Lanka.

Fuent: http://www.lamarea.com/2014/02/16/una-ong-denuncia-que-4-000-trabajadores-moriran-en-las-obras-para-el-mundial-de-qatar/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.