ONG documenta 130 muertes y desaparicions d’immigrants en 2013

"A respuesta que se ye dando ye una dura represión, fruito d'a histeria debant d'una puyada d'a dentrada de migrants por Ceuta y Melilla que no ye tant dramatica"

Bells immigrants ferius. (Foto: José Palazón /PRODEIN)

Bells immigrants ferius. (Foto: José Palazón /PRODEIN)

“O que nos contrimuestran as zifras ye que no cal alarmar-se”. Asinas qualifica Rafael Lara, coordinador de l’aria de solidaridat internacional de l’Asociación Pro Dreitos Humans d’Andalucía (APDHA), a situación en a buega sud d’Espanya y a plegada de immigrants a traviés d’a cleta de Ceuta y Melilla.

Seguntes l’informe d’APDHA presentau hue mesmo, o fluxo migratorio se mantiene de forma similar a o de fa tres anyos. En l’anyo 2011 crucioron de forma ilegal a buega por Ceuta 1.258 personas, un numero que baixó en 2012 a 756 y tornó a puyar l’anyo pasau a 1.846. En Melilla, se pasó d’1.039 personas en 2011 a 2.105 en 2012 y 2.508 en 2013.

Ta Rafael Lara, istes datos contrimuestran que “as zifras que han amaneixiu en os meyos de comunicación en os zaguers días son una exacheración; a realidat ye que no somos debant d’una situación descontrolada, sino en uns rans perfectament asumibles y chestionables por meyo d’unatro tipo de politicas”.

En relación con o numero de personas muertas y desapareixidas, seguntes os datos que a APDHA ha puesto conoixer, s’ha produciu una baixada y se situga en 130 personas en 2013, respective a las 225 de l’atro anyo. “Ista baixada resulta sorprendent, tenendo en cuenta que os metodos de dentrada son cada vez mas precarios y que cada vez puya mas o control y represión sobre as personas migrants”, concluye Rafael Lara. D’os muertos, a mayoría murioron en Marruecos (42) y Archelia (25), y a resta en Andalucía (24), Ceuta (24) y Melilla (15).

En iste sentiu, y en relación a os feitos d’o pasau 6 de febrero que provocoron a muerte de 15 immigrants quan se miraban d’acceder a sulero espanyol, Lara denuncia que “a respuesta que se ye dando ye una dura represión, fruito d’a histeria debant d’una puyada d’a dentrada de migrants por Ceuta y Melilla que no ye tant dramatica”.

A APDHA considera “inadmisible a sucesión de versions contradictorias” por parte d’a Delegación d’o Gubierno en Ceuta, o director cheneral d’a Guardia Civil y o ministro de l’Interior. Por iste motivo, reitera a “exichencia de dimisión de ditos responsables politicos y d’a enchegada d’una comisión parlamentaria d’investigación”.

Fuent: http://www.lamarea.com/2014/02/19/un-informe-rebaja-el-nivel-de-alarma-ante-la-llegada-de-inmigrantes-por-ceuta-y-melilla/

Una rispuesta a ONG documenta 130 muertes y desaparicions d’immigrants en 2013

  1. Pingback: ONG documenta 130 muertes y desaparicions d’immigrants en 2013 » AraInfo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.