Organizacions ambientals y socials refusan l’esbruixallo de posición d’a Comisión de l’Augua

SEO/BirdLife, ANSAR, COAGRET y Ecologistas en Acción denuncian o incumplimiento d'a Directiva Marco de l'Augua

As organizacions denuncian o malfurrie d'augua (Foto: Arainfo)

As organizacions denuncian o malfurrie d’augua (Foto: Arainfo)

SEO/BirdLife, ANSAR, COAGRET y Ecologistas en Acción refusan que se fomente un planteyamiento anticuau y incompatible con cumplir o dreito comunitario y l’emplego insostenible de l’augua.

Istas organizacions, como parti d’a representación ambiental y social en a Comisión de l’Augua d’Aragón, se desmarcan de qualsiquier mensache que charre de consenso en o documento final que presente iste organo consultivo.

As organizacions consideran una irresponsabilidat institucional fomentar una politica d’auguas productivista centrada en puyar as demandas quan as directivas europeas requieren l’emplego sostenible de l’augua, a recuperación d’os costes y a protección d’os ecosistemas acuaticos.

Seguntes istas organizacions, a Ponencia de Bases d’a Comisión de l’Augua d’Aragón mantiene un planteyamiento incompatible con o cumplimiento d’a Directiva Marco de l’Augua (DMA) y que metería en risque o cumplimiento d’atras directivas comunitarias, como as de Aus, Habitats, Impacto Ambiental y Chestión de risque d’engaronadas.

Istas organizacions consideran especialment alarmant que se mantiengan obchetivos d’o sieglo pasau como a demanda d’un catalogo d’obras de regulación “lo más amplo posible” con l’unico obchetivo de fer puyar as demandas, sin sisquiá planteyar-se a suya compatibilidat con a DMA. Antimás istas obras son a causa de desequilibrios territorials y provocan graus conseqüencias socials y emocionals metendo en dubda o suyo suposau intrés cheneral. Esclaters eixemplos d’ista politica son o recreiximiento de l’entibo de Yesa y Las Torcas, l’entibo de Biscarrués u o de Mularroya.

As asociacions sinyants refusan de tot os planteyamientos d’a Ponencia de Bases d’a Comisión de l’Augua d’Aragón, ya que pareix que o Gubierno d’Aragón y os usuarios de l’augua consideran adecuau l’actual Esbruixallo d’o Plan Hidrolochico de l’Ebro y preban de fer vistero o suyo “refirme explicito”. Debant d’isto, antimás de repetir o refús publicament, as organizacions han dau treslada a la Comisión de diferents proposas ta lograr un Plan Hidrolochico de l’Ebro que cumpla con a DMA y empache risques de pinyoras millonarias y que s’aturen fundos europeus.

Proposas d’as organizacions t’a Comisión:

-Exichir un rechimen de cabals que guarancie o cumplimiento d’os obchetivos d’a DMA y un compromís ta que as midas s’endrecen ta plegar en un buen estau d’os rios y acuifers nuestros.

-Transparencia economica en todas as obras hidraulicas, con plena consideración d’alternativas.

-Una Politica Agraria Común que gurancie o cumplimiento d’os obchetivos ambientals d’a DMA.

-Cumplir con las obligacions respecto a los plans de chestión d’espacios protechidos d’o rete Natura 2000 de Aragón.

-Incluyir o Inventario de Humedals d’Aragón en o Inventario Nacional de Zonas Humedas

-Compromís d’o Gubierno d’Aragón ta cumplir as suyas responsabilidatz por as suyas competencias dreitas en materias relevants a o cumplimiento d’a DMA.

As organizacions que i sinyan, representants d’a sociedat civil aragonesa, demandan a la Comisión de l’Augua d’Aragón que se embreque con responsabilidat y compromís en istas proposas que consideran d’intrés t’Aragón y, son l’unico camín ta protecher os ríos y acuifers d’Aragón y t’asegurar recursos hidricos en cantidat y calidat t’Aragón.

 

Fuent: http://arainfo.org/2012/10/organizaciones-ambientales-y-sociales-rechazan-el-borrador-de-posicion-de-la-comision-del-agua-de-aragon/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.