Organizacions estudiantils independentistas y de cuchas claman a movilizar-se en contra d’os retalles de Wert

En Aragón, o colectivo d'estudiants independentistas de cuchas "Universidat" organizará ista chornada de luita

Diez organizacions estudiantils representants de l’estudiantalla en as diferents nacions en l’Estau espanyol han convocau t’o venient diya 11 d’octobre “diya internacional de luita” en contra d’as zagueras reformas levadas a cabo por o gubierno d’o PP. Os representants estudiantils acusan a o gabinete dirichido por Wert querer “centralizar” l’educación con as reformas que “preban imposar” dende o Gubierno Central, impidiendo a cada nación a suya libre determinación. Acusan, tamién, a os diferents dirichentes autonomicos y forals aplicar as decisions “sin ningún tipo de reparo” debant l’oposición d’a ciudadanía. Istas midas, seguntes explican, dixan a “as diferents nacions sin amparo politico, dando asinas trangos enta un estau centralista en mans d’a dictadura d’os mercaus”.

Son agrupacions de diferents culturas politico-socials chuntas por un mesmo fin: revindicar a soberanía de cada pueblo ta poder decidir arredol d’a suya educación, dando trangos, asinas, enta alternativas reyals y populars debant os procesos de mercantilización d’o sector publico. En Aragón, o colectivo d’estudiants independentistas de cuchas “Universidat” organizará ista chornada de luita. Tamién i participan o Sindicat d’Estudiants dels Països Catalans, Yesca dende Castiella, o sindicato SAT y Jaleo d’Andalucia, AGIR y a Liga Estudiantil Galega, dende Galicia, Regüelta dende Cantabria, Darreu d’Asturias, y Ikasle Abertzaleak d’Euskal Herria.

Anotan que con a sincusa d’a crisi economica, dende o Gubierno espanyol se pretenden “disminuir os dreitos socials, politicos, lingüisticos y culturals d’as nacions”. Denuncian que debant d’una crisi “creyada por os mesmos que son chestionando lo poder dende os diferents marcos gubernamentals nos son empentando a un sistema esclavista an os ricos son más ricos y os pobres, más pobres; do os nuevos faraones tien nombres de multinacionals y que, “mediante o total alcuerdo d’os gubernants y a patronal, continan fatigando a ixa clase oprimida mediante os nuevos trallons que son as fuerzas represivas de l’estau”.

Adhiben, antimás, que “a mala situación que sofren as diferents luengas y culturas d’os pueblos, no escan empentarlas, sino condenarlas a desapareixer retallando os presupuestos en educación y cultura”. Debant d’isto, os diferents representants estudiantils sinyalan a ideya d’o Gubierno de “querer prebar d’uniformar a as nacions de l’Estau ta que a suya eslanguida estructura pueda continar existindo”.

Ta ixo, subrayan que, “mientres que puya o gasto melitar y os chornals d’os politicos puya tamién sin garra problema”, diya par d’atro ye “más esclatera a degradación d’a calidat de l’educación con, por eixemplo, a puyada d’o ratio por alumno en as aulas u as puyadas d’as horas lectivas que o profesorau debe eixercer”.

Remeran que han estau un colectivo a o que clamaban de barrenau y extremista quan prencipió criticando lo proceso de Bologna y a privatización y mercantilización que él mesmo trayería. Anyadas dimpués, critican que “siga agora quan os diferents rectores se faigan os sorprendius” debant d’as reformas de Wert.

Frent a as reformas, soberanía

As organizacions independentistas, manimenos, dicen tener alternativas a as reformas. Seguntes explican en un manifiesto común, “l’unica surtida ye eixercer o dreito de cada pueblo ta decidir arredol d’o suyo esdevenidero”. Ta ixo, suman, “a soberanía que nos fa estar suchetos en totz os procesos y no simples obchetos de compra y venda t’estar condenaus ta cutio por istos acontecimientos. Diya par d’atro dende cada centro educativo hemos de luitar contra cada mida imposada dende o gubierno y escar as alternativas necesarias t’aconseguir os nuestros obchetivos. Eixercendo o dreito a l’insumisión debant d’as politicas foranas espanyolas y d’imposición, ta poder construyir a nueva escuela que nos eduque como personas libres, criticas y solidarias”.

En iste camín, concluyoron que “l’unica alternativa posible ye una escuela publica, laica, popular, antipatriarcal, de calidat y que cumpla con todas as necesidatz lingüisticas y culturals de cada nación”. En ixe camín, convidaron a toda l’estudiantalla d’as suyas respectives “nacions oprimidas” a movilizar-se en contra d’as reformas d’o Gubierno de Rajoy y a favor d’a soberanía que “como pueblo nos perteneixe a cada uno”.

Fuent: http://11x12.wordpress.com

Una rispuesta a Organizacions estudiantils independentistas y de cuchas claman a movilizar-se en contra d’os retalles de Wert

  1. Pingback: Organizaciones estudiantiles independentistas y de izquierda llaman a movilizarse en contra de las reformas de Wert | Universidat

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.