Organizacions politicas y socials condenan os excesos policials d’o cabo de semana en Zaragoza

Qualques organizacions tornan a demandar a dimisión de Gustavo Alcalde dimpués d'unatra polemica por l'actuación policial.

Imachen d'a manifestación (Foto: Arainfo)

Imachen d’a manifestación (Foto: Arainfo)

L’actuación d’a policía espanyola iste cabo de semana en Zaragoza contina criticando-se dende amplos sectors d’a sociedat aragonesa. Tot prencipió lo viernes, quan una manifestación en refirme a los vecins de Gamonal (Burgos) remató con enrestidas policials y disturbios. Mientres tres diyas, o centro de Zaragoza ha pareixiu una ciudat sitiada debiu a la fuerte presencia de cientos de policías y a la suya actitut con os manifestants y toda la resta de ciudadans que pasaban por Paseu Independencia, Sant Vicent de Paul os Cosos u tot lo vico d’a Madalena, a on que bi habió prous disturbios. A qualques personas les calió atención medica, incluyindo una persona que perdió l’esmo en a carrera Sant Vicent dimpués d’un batán d’a policía y que habió d’estar atendiu por os vecins que i yeran.

As reaccions han plegau dende organizacions politicas y socials, a soben en forma de condena d’istas actuacions policials. Chunta Aragonesista, a traviés d’o suyo diputau en o Congreso espanyol, Chesús Yuste demandará explicacions por “os sucesos acontecius” y especialment “por a desproporcionada actuación policial con a enchaquia d’as concentracions feitas refirmando a los vecins d’o vico de Gamonal en Burgos. Iste partiu denuncia antimás “a demanda indiscriminada de carnés a tot qui bi pasaba y mesmo a detención o viernes de personas allenas a los incidents.”

Izquierda Unida tamién ye critica con l’actuación policial, y considera que o viernes tenioron una actitut “clarament indimidatoria y provocadera antis que no bi hese garra incident”. IU sinyala  a la Delegación d’o Gubierno espanyol en Aragón por dar la orden d’intervención a los antidisturbios y considera que ixa orden yera “más propia d’un estau de sitio ya que, en cuenta de protecher y isolar os minimos incidents producius, enristioron indiscriminadament”.

O sindicato anarquista CGT ya demandó iste sabado a dimisión de Gustavo Alcalde, Delegau d’o Gubierno espanyol en Aragón, criticando tamién as detencions – ueito mientres tot lo cabo de semana – y l’actuación policial. Toda mena d’organizacions han demandau tamién a dimisión de Alcalde u han condensau os feitos. Dende partius como Puyalón u Izquierda Anticapitalista a Asociacions de Vecins, como la d’A Paz u Lanuza- Casco Viejo, movimientos ciudadans y dica organizacions chovenils como Purna u UJCE.

En respuesta a istos feitos, ya bi ha convocada una manifestación de refús o venient sabado 25, a las 18:00 en o Paraninfo de Zaragoza. Baixo os lemas “Gamonal somos todas. A carrera ye nuestra”, os manifestants demandarán que se retiren os cargos (resistencia y desobediencia a la autoridat) d’os ueito detenius, y que remate “l’estau de sitio”. Estau que continó iste domingo, con presencia de prous furgons policials en o Paseu Independencia, a tamás de que no bi habió garra manifestación.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.