Os afectaus por as creixidas de l’Ebro podrían recibir aduyas publicas

A tamás d'as compensacions economicas, os afectaus demandan "escoscar o cauz" ta privar esferras futuras.

L'Ebro por Zaragoza

L’Ebro por Zaragoza

Modesto Lobón, conseller d’Agricultura d’o Gubierno, ha sinyalau iste lunes que, lo más prebable, ye que os afectaus d’os zaguers meses por as creixidas de l’Ebro recibirán aduyas d’o Ministerio d’Agricultura. En primeras, no son confirmadas pero o conseler aragonés ha sinyalau que a situación “se ye estudiando” y dende Madrit le han feito entender que plegarán ixos fundos.

As debantditas aduyas esdevienen un chiquet apanyo ta totz os agricultors y amos de tierra que, dende o mes de chiner, han visto como o cabal de l’Ebro no ha baixau dica “rans acceptables”. Dende a primer creixida d’iste 2013, son muitos os campos que han teniu una napa d’augua quasi perén. Como conseqüencia d’istas creixidas, as cosechas d’ista anyada s’han perdiu y, como remeran os afectaus, muitas d’ellas ya no se podrán recuperar t’a present campanya.

“Pareix que bi habrá aduyas, encara que no han concretau quanto porque lo son estudiando“, ha sinyalau o conseller d’Agricultura. Con tot y con ixo, ha remerau que l’Ebro no nomás ha causau mals en Aragón y que as creixidas son estadas un problema present en atras muitas redoladas. “A situación ye complexa en todas as Comunidatz Autonomas, se son estudiando as esferras agrarias y en infraestructuras hidraulicas y s’ha dau orden a Agroseguro ta que faiga lo mesmo”, ha matizau.

En iste sentiu, Lobón ha remerau que entre que l’anyada pasada la sequera yera un problema quasi nomás d’Aragón, estianyo as creixidas ha afectau a qualques comunidatz. “Creigo que ista vegada a situación ye nacional”, ha destacau o conseller.

Entre que plegan as aduyas, os afectaus por as creixidas d’o río Ebro, demandan una “solución finitiva ta que as creixidas no esdeviengan un problema totz os anyos”. En qualques trobadas con esferents responsables publicas han esfendiu que “a solución pasa por escoscar de traza finitiva o cauz, que prive de que se’n salgan as auguas y asinas no haber de perder cullidas todas las anyadas”.

 

Fuent: http://www.aragon2.net/n-20779-2-afectados_crecidas_Ebro_podrian_recibir_ayudas_publicas

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.