Os alcaldes de Teruel y Reus se reunioron en FITUR ta promocionar o modernismo

As dos ciudatz tienen una gran patrimonio arquitectonico modernista

Imachen d'a reunión (Foto: Concello de Teruel)

Imachen d’a reunión (Foto: Concello de Teruel)

L’alcalde de Teruel, Manuel Blasco, y l’alcalde de Reus Carles Pellicer, mantenioron una reunión de treballo en o marco d’a feria internacional de turismo (FITUR) que se celebró en Madrit.

A trobada surtió a radiz d’as celebracions organizadas con a enchaquia d’o centenario d’o Modernismo en Teruel ent’a fin de l’anyada pasada. A gran repercusión meyatica suya fació que l’alcalde de Reus, lugar que igual como Teruel ye en a Ruta Europea d’o Modernismo, s’intresase por iste asunto con a fin de promover bella mena d’actuación de conchunta ta procmocionar iste estilo arquitectonico en as dos ciudatz. Reus, localidat natalicia de Gaudí, tamién contó, igual como Teruel, con Pau Monguió como arquitecto municipal mientres bellas anyadas.

“Os dos somos intresaus en fer relacions más estreitas arredol d’o modernismo ta fer promoción turistica de Teruel en Reus y a suya redolada y de Reus en Teruel y a suya provincia”, dició Blasco. L’alcalde teruelano le explicó a lo de Reus as actividatz que se programoron mientres seis semanas arredol d’o modernismo en a ciudat: exposicions, charradas, visitas guidadas, conciertos. “Nusatros prencipiemos en 2012 a potenciar o Modernismo nuestro como reclamo turistico, entre que ells, que contan con un important patrimonio en iste estilo arquitectonico, lo levan fendo dende 1996. Hemos quedau en intercambiar información ta fer un esbruixallo de convenio a on que apareixca una declaración d’intensions ta establir bella mena de colaboración”, explicó Blasco.

Os responsables de Turismo de Reus y l’alcalde suyo, visitarán Teruel ta conoixer “in situ” os edificios modernistas d’a ciudat, indo ta Reus dimpués una delegación d’o concello de Teruel.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.