Os APN d’o Gubierno d’Aragón detectan l’uso de verenos pa la eliminación d’abellaruelos

S'han localizau en o Semontano de Balbastro quasi una decena d'ubicacions con substancias toxicas destinadas a enverenar a ista especie

2013-07-15_veneno-abejarucos2

Foto: Kookaburra 81

Os Achents de Protección d’a Naturaleza (APN) d’o Gubierno d’Aragón, adscritos a l’Aria Medioambiental d’o Semontano de Balbastro, dimpués d’una  investigación, han detectau l’uso de verenos pa la eliminación d’abellaruelos, una especie protechida que ye sufrindo una regresión cheneralizada.

Os APN han localizau quasi una decena d’ubicacions en as qualas s’utiliza una substancia destinada a enverenar a ista especie. A substancia yera impregnada en os posaders que as aus fan servir por un regular u bien en posaders especialment habilitaus por o denunciau. A elevada toxicidat d’a substancia emplegada actuaba supuestament por contacto, zabucando a las aus malas que istas se posaban y quedaban impregnadas en a mesma. A zona ha estau revisada igualment por a Unidat Canina Antiverenos d’o Gubierno d’Aragón con a quala os APN localizoron nuevas prebas que ha estau adhibidas a las dilichencias practicadas.

As muestras replegadas por os APN han estau remitidas a o Laboratorio Forense y se ye a l’aspera de l’analitica, con a finalidat de determinar a substancia utilizada.

Todas as dilichencias realizadas por os APN, asinas como os elementos intervenius, han estau mesos a la disposición d’os Servicios Churidicos d’o Departamento d’Agricultura, Ganadería y Medio Ambient d’o Gubierno d’Aragón.

Ista operación va a permitir erradicar una practica ilegal contra a fauna que, si bien no pareixe estar estendillada, chenera enormes risques contra o medio ambient y a fauna.

L’abellaruelo

L’abellaruelo (Merops apiaster) ye una chocant especie, de color marrón, royisca y amariella, o garganchón amariello y as partes inferiors azulas. Vive en zonas con talutz de tierra an que excavan o suyo niedo. S’alimenta de toda mena d’insectos voladors. Figura incluida en o Catalogo Nacional d’Especies Menazadas y en a Directiva 79/409/CEE de conservación d’as aus silvestres.

O vereno como forma d’erradicación

L’uso de verenos pa la eliminación de qualsiquier especie silvestre y a suya utilización en o medio natural ye una practica ilegal, contemplada en o Codigo penal y que puede levar aparelladas penas de dica 24 meses de prisión. Amás d’istas penas y as posibles sancions economicas, l’uso d’ista mena de practicas puede levar aparellada a perda d’aduyas derivadas d’a PAC y d’as Aduyas Agroambientals.

Fuent: http://www.cronicadearagon.es/wordpress/?p=42700

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.