Os astronautas d’o Mars 500 tornan t’a vida normal dimpués de 520 diyas

Mientres quasi una anyada y meya han estau encerraus simulando un viache ta Marte

Marte (Foto: NASA)O experimento Mars 500 ha rematau con exito, seguntes os suyos responsables. Os astronautas tornoron, o pasau viernes a viyer a luz natural dimpués de 520 diyas, quasi una anyada y meta, encerraus simulando un viache ta Marte.

Os rusos Alexéi Sítev, Sujrob Kamólov y Alexánder Smolenski, o italiano d’orichen colombiano, Diego Urbina, o francés Romain Charles y o chino Wang Yue estioron os seis esleixius ta iste prochecto a on que s’han prebau de simular todas as condicions posibles d’un viache ta Marte. Entre atras as averias, as situacions d’emerchencia y mesmo o retardo en as sinyals dende a Tierra. Prou que, seguntes os disenyadors de l’experimento, os astronautas tendrían arrienda de atros problemas no simulaus. No s’ha simulau  manca de gravedat, ni a exposición t’alteros indices de radiación y, en un viache de verdat no podrían fuyir d’a nau, cosa que sí podeban fer en o experimento si hesen quiesto.

O psicologo d’a misión ha reconoixiu que bi ha habiu pleitos y problemas entre os tripulants, como ye natural entre seis personas que se foten meses vivindo chuntos. Ista demba, a d’a psicolochía, yera a de más intrés en a misión, que teneba como un d’os obchetivos saber como afectaría mentalment ista mena de misions a os astronautas.

Os seis participans han quiesto viyer a la parentalla suya a escape.  Agora serán mientres un mes visitando un hespital a on que les ferán prebas mientres un mes entre que se tornan a fer a las ulors, rudio y aire “nueva” y, más que más, a la presencia de más chent.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.