Os astronomos descubren un pulsar “amán” d’o gran forau negro d’a Vía Lactia

Scientificos descubre un pulsar amán d'o forau negro d'a Vía Lactia que permitirá de medir o campo magnetico que n'i hai en ista zona d'a galaxia

pulsar via lactiaEn o centro d’a nuestra galaxia, a Vía Lactia, a 26.000 anyos luz d’a Tierra, ha d’haber-ie un forau negro supermasivo trusquindo materia, sobre tot gas, que forma un disco en espiral a o suyo arredol. O proceso chenera uns potents campos magneticos, tamién formando un remolino, y os scientificos creyen que istes campos fan que una parte de materia se salve d’o voraz forau en salir disparada enta difuera en dos chorros superrapedos.

Asinas que o campo magnetico d’o centro galactico ye de suma importancia pa conoixer a estructura d’o fluixo de material d’o que s’alimenta o forau con a suya potent atracción gravitatoria. Pero o centro galactico ye escureixiu, pa los telescopios opticos, por o gas y o polvo, o que dificulta a suya observación. D’iste forau negro se conoixe a suya masa (ye uns quatro millons de vegadas mas masivo que no o Sol), pero o suyo entorno cercano tant extremo asinas como muitas d’as suyas propiedatz encara no se comprenden, recalcan os astronomos.

En a suya aduya ha plegau un pulsar, una estrela de neutrons, supercompacta, en rotación, que emite radiación en polsos periodicos y que ha d’estar a menos de medio anyo luz d’o forau negro (o mas amán d’o mesmo que s’ha descubierto).

Se tracta d’una mena poco común de pulsar, con un campo magnetico extraordinariament intenso. Estió trobau a resultas d’una purna de rayos X que un telescopio d’a NASA, o Swift, captó l’abril pasau procedent d’o centro d’a Vía Lactia y as observacions posteriors con diferents radiotelescopios en qualques países permitioron de determinar que se tractaba d’un pulsar, denominau PSR J1745-2900. “En o nuestro primer intento d’observación, no yera clarament visible, pus qualques pulsars son tozoludos y exichen de mas observacions pa deixar-se detectar”, explica Ralph Eatough, scientifico de l’Instituto Max Planck, en Alemanya, y lider d’a investigación, que se publica en a revista Nature. “A segunda vegada que l’alufremos”, contina, “o pulsar s’heba feito muit activo en a banda de radio y yera muit brillant. No me podeba creyer que finalment hebanos detectau un pulsar en o centro d’a galaxia”.

PSR J1745-2900 ha permitiu a os astronomos de medir a intensidat d’o campo magnetico en a zona inicial d’o fluixo de materia que caye en o forau negro, indicando que, efectivament, i hai un potent campo magnetico y a gran escala, sinyalan os investigadors de Max Planck.

L’analís d’as radioondas procedents d’o pulsar amostran que yeran sufrindo un retorcimiento important en o suyo viache dica a Tierra, un fenomeno que se produce quan as ondas traviesan gas immerso en un campo magnetico, explican os scientificos de l’Observatorio Nacional de Radio Astronomía (NRAO, en os EE.UU.) que han participau en a investigación. Y iste gas ye a uns 150 anyos luz d’o forau negro, exactament en a linia d’observación entre o pulsar y a nuestra planeta.

Os astronomos calculan a fuerza d’o campo magnetico medindo o chiro d’as radioondas en pasar por o gas. “O campo magnetico ye una parte crucial d’os arredols d’o forau negro que afecta a la estructura d’o fluixo de materia que ye cayendo en ell y mesmo regula ista circulación”, puntualizan os investigadors d’o NRAO. As midas que han preso indican que o campo magnetico allá ye relativament organizau, en cuenta d’estar turbulento.

Os investigadors siguen pendients de l’oportuno pulsar asperando detectar cambeos a mida que se desplaza arredol d’o forau negro. De vez miran mas pulsars d’ista mena pa aplicar a mesma tecnica d’observación y poder fer un mapa detallau d’o campo magnetico en as proximidatz d’o forau negro.

Pero o primer pulsar ha tardau decenios en amaneixer. Y no ye prou amán d’o forau negro pa medir as propiedatz d’o espacio/tiempo d’a Relatividat Cheneral d’Einstein. “O ideyal sería trobar atro pulsar encara mas amán d’o forau negro, o que nos permitiría de fer medicions mas precisas”, apunta Eatough.

Fuent: http://noticies.sirius.cat/2013/08/els-astronoms-descobreixen-un-pulsar.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.