Os “atros” Pilars d’Aragón

Fraga, Calanda, Colungo, Teruel u Samianigo cilebran tamién as fiestas d'o Pilar

Mientres que Zaragoza s’atura huei ta cilebrar o diya gran d’as suyas fiestas atras muitas localidatz aragonesas cilebran tamién os Pilars. De muitas redoladas y en fiestas grans y chicotas lugars y ciudatz son istos diyas vivindo entre o goyo festiu.

Cantalobos, lugar que perteneixe a o concello de Lanaja en os Monegros remata huei as suyas fiestas d’octobre. Fraga, capital d’a Cinca Baixa vive os suyos diyas más importants. Ye a ciudat más gran que cilebra as fiestas dimpués de Zaragoza en istos diyas d’aguerro.

Pero tamién Calanda, conoixida más que más por os bombos y os tambors, tamién ye de fiestas, que empencipioron ahiere. Vaquillas, cabezudos, toros, verbenas y borinas son ta os calandins o más important d’istos diyas.

Lierta, en a Plana de Uesca, y que perteneix a la Sotonera tamién tien un diya especial o 12 d’octobre, como Puertomingalvo en Gudar-Chabalambre, an que encara que no son fiestas patronals, o diya d’o Pilar tamién ye prou important.

En o Semontano de Balbastro ye Colungo o lugar que ye en plena cilebración. Verbenas, disco-movil, folklore y concursos de guinyote y atros chuegos, marcan l’actividatz festiva.

Pomar de Cinca, fiestas chicotas y Belver de Cinca, lugars amanaus, tienen tamién actividatz y fiestas, encara que en Belver iste anyo han quedau una mica oscuridas por un accident en as ferias que ha causau a muerte d’una presona en un incendio.

En Torla tamién prencipioron as fiestas ahiere. En iste lugar sobrarbense as rondas, palotiaus, ixotas y bailes tradicionals son o programa central d’istos diyas. En Samianigo ye o vico de Puent de Sardas o que cilebra as fiestas, con mosica y borina, asinas como lo fa o Vico d’o Pilar de Teruel, con o toro como protagonista ye de fiestas.

De seguras que bi’n ha más lugars en fiestas, en iste chicot repaso por Aragón. Quals mos hemos dixau? Mos dices como se fan os Pilars en o tuyo lugar?

Una rispuesta a Os “atros” Pilars d’Aragón

  1. ara son tamé las fiestas de Castilló (Alta Ribagorza), agon fan un ball molt pareseu al més conoixeu de Benás…

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.