Os bombers d’Aragón alertan d’a precariedat d’o servicio y exichen 200 efectivos mas

Reclaman que o Gubierno d'Aragón asuma as competencias d'o servicio d'extinción d'incendios y creye un cuerpo unico

Incendio en as Cinco Villas en 2015. Foto: Gubierno d'Aragón

Incendio en as Cinco Villas en 2015. Foto: Gubierno d’Aragón

“No somos conscients d’o risgo que suposa tener unos servicios de bombers deficitarios en Aragón; si tiens un accident u un incendio en Zaragoza te van a atender bien, pero no ocurre lo mesmo, si lo tiens en a zona d’Ayerbe, en a Val d’Echo u en a Litera o cabo de semana”.

Asinas de claro se manifiesta Ricardo Rivero, bombero de Uesca y miembro de l’Asociación de Bombers Profesionals d’Aragón. Ista organización estió constituida en 2013 debant d’a fartera de muitos profesionals d’iste oficio, en considerar que no se ye realizando un servicio adequau a os ciudadanos. Calculan que, a lo menos, fa falta cerca de 200 efectivos mas pa atender a todas as zonas d’Aragón por igual y exichen que sía o Gubierno d’Aragón qui asuma as competencias.

 Actualment, en Teruel, fa iste servicio a Diputación Provincial; en Uesca lo fan as comarcas, fueras d’a capital do l’asume o Consistorio, mientres que en Zaragoza, iste servicio ye de competencia municipal y provincial.

Prencipalment, dende l’asociación, meten o foco en a provincia de Uesca y Teruel, do os servicios de bombers son “muit tasos” con un numero “baixo d’efectivos”, que no cumple con a lei 1/2013 de Regulación y Coordinación d’os Servicios de Prevención y Extinción d’Incendios y de Salvamento d’Aragón , que entró en vigor en 2014.

Ista normativa fixa en 35 minutos o ratio maximo pa plegar en o puesto d’o siniestro, un tiempo que se prolarga en muitas zonas d’Aragón.

Explosión en Frula (Monegros)

Asinas ocurrió o pasau 31 de chulio en a localidat monegrina de Frula. Una explosión de gas propano provocó feridas grieus a una muller de 35 anyos en l’interior d’una casa. Como a Comarca d’Os Monegros no disposa d’un Parque de Bombers Profesionals, l’alerta se derivó a o Parque de Bombers de Uesca, que os suyos efectivos se trobaban en ixe momento sofocando un incendio en Angüés. Manimenos, aconsiguioron movilizar a atros tres, que se tresladoron dica o puesto d’os feitos, encara que 45 menutos dimpués d’a explosión. Quan i plegoron ya yera tarde, porque  os propios vecins, metendo “en risgo as suyas vidas”, heban sofocau iste “grieu” incendio con extintors y una manguera de ruxiar, “privando una trachedia encara mayor”, relata. Iste suceso mete de manifiesto pa l’asociación a necesidat real d’uns Servicios Minimos de Prevención y Extinción d’Incendios en Aragón que cubran tot o territorio, “as 24 horas d’o día y os 365 días a l’anyo, pa guarenciar a seguranza a qualsiquier ciudadano d’Aragón independientment de do viva”.

Pero a realidat que viven istes profesionals no pareixe estar asinas. Igual que en a Comarca d’Os Monegros, do no bi ha un Servicio de Bombers Profesionals, atras rechions aragonesas son mas desprotechidas, especialment en a provincia de Uesca do istas competencias dependen d’as comarcas. Entre ellas, destacan a Ribagorza, con nueu bombers repartius en tres parques comarcals diferents –Villanueva, Graus y Benavarri- pa atender un ambito territorial extenso. Ista situación, amás, se veye agravada dende que o Parque de Benavarri atiende as intervencions d’A Litera, a causa d’o zarre d’o suyo parque de 18:00 a 08:00 horas y os cabos de semana.

Y lo mesmo ocurre en a zona d’Ayerbe, Binefar, Ansó, y a Val d’Echo, en a provincia de Uesca. O Matarranya u O Mayestrato en a provincia de Teruel u a zona de Belchit, en Zaragoza, no cumplen tampoco con os servicios minimos seguntes l’asociación.

As Comarcas d’a Litera, o Cinca Medio, o Baixo Cinca y a Ribagorza sinyoron un convenio pa la coordinación d’as actuacions d’o servicio de bombers, un alcuerdo que, dende o sindicato profesional de bombers d’Aragón, qualifican de “cortina de fumo”, porque “as carencias son as mesmas”.

Voluntarios pa la extinción d’incendios

Pa cubrir as vacants d’o personal de Servicios de Bombers, as tres provincias contan con 53 Agrupacions de Voluntarios de Protección Civil, que aduyan en as labors d’extinción d’incendios. Dende a organización, critican iste sistema, en considerar que se mete en chuego a seguranza d’as personas. Sinyalan que en a Ribagorza s’ha ubierto una nueva bolsa de treballo pa cubrir istas vacants, sin exichir a qualificación fisica y a preparación necesaria pa istes casos. “Y isto ocurre en tot Aragón”, precisa.

“Tienen buena voluntat, pero no solament son privando un servicio de calidat a o ciudadano que atienden, sino que son metendo en risgo a suya integridat, en no tener as condicions tecnicas y fisicas necesarias”, indica Rivero. Explica tamién que ista precariedat provoca situacions de muito estrés pa lo bombero profesional, ya que no conta con o emparo necesario pa atender un accident u un suceso. “Si solament va un bombero a un accident en que bi ha tres personas, ha de decidir a quála quitar antes, metendo a vida d’un por debant d’a de l’otri”, sostiene.

Dende a organización destacan, amás, que istas personas son voluntarias, ye dicir, no tienen a obligación d’atender una trucada d’emerchencia u d’acudir a o puesto d’os feitos, como ocurrió en a explosión de Frula, quan habioron d’alertar a os bombers d’o Concello de Uesca en no recibir contestación. Iste sistema de voluntarios fa creyer a os ciudadanos que son bien atendius, porque van equipaus como “un bombero profesional quan no’n son.”

Debant d’ista situación, dende l’Asociación de Bombers Profesionals tienen clara a solución que pasa por que o Gubierno d’Aragón asuma as competencias y empente a creyación d’un cuerpo unico sin voluntarios. Reclaman 90 plazas de bombers profesionals en cadaguna d’as provincias de Uesca y Teruel, o que suposaría, seguntes os suyos calculos, una inversión de 6 millons d’euros en total -3 millons pa cadaguna-. Y critican que, dos anyos dimpués d’a entrada en vigor, encara o Gubierno d’Aragón no bi haiga catalogau os parques -prencipal, secundario, apoyo-, pa dotar-los d’un personal minimo.

Fuent: http://www.eldiario.es/aragon/sociedad/bomberos-Aragon-precariedad-servicio-efectivos_0_547345491.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.