Os celiacos gastan a o mes 126,41 euros más en a suya compra

O pre de bells productos especials ta celiacos puya o total d'a cesta.

Productos tan cutianos que mercamos asoben como puet estar o pan, os cereals u as galletas, suposan un gasto extra a la fin d’o mes si somos celiacos. Ista malotía ye una intolerancia ta cutio a toda a virolla que tienga gluten y en Aragón no cuenta con refirme economico.

Una de cada cien personas ye celiaca. Istas son as cifras que a Federación de Asociacions de Celiacos d’Espanya (FACE) alporta en o suyo “Cuaderno t’a malotía celiaca. En Aragón existen 1.500 familias asociadas que cuentan, a lo menos, con una persona que tienga ista malotía. Todas ellas, seguntes amuestra o “Informe de pres” d’iste 2011, destinan a l’anyada 1.516,97 euros más que cualsiquier atra familia en a suya cesta d’a compra.

A virolla ta celiacos, ye decir, ixa que no’n tien de gluten, tienen tipificau un 8% d’IVA, en estar consideraus como productos de dietetica y “ta nusatros son elementos de primer necesidat”, ha afirmau Noelia Panillo, dietista de l’Asociación Celiaca Aragonesa. Isto fa que virolla tan común como a farina u lo pan, tiengan una puyada d’o 677% y d’o 500 %, respectivament, con respecto a la que no tien gluten, seguntes o “Informe de pres” d’a FACE.

A tamás d’istas cifras, dende l’Asociación Celiaca Aragonesa han reconoixiu que os pres se han estabilizau en as zaguers anyadas debiu a que ha creixiu a ufierta y isto fa que iste mercau siga china chana más competitivo”. “A ufierta en as zaguers cinco anyadas s’ha triplicau”, ha comentau Panillo. A dentrada de “marcas blancas” en iste sector tamién a favoreixiu que os pres no puyen y ha feito honra ta enamplar a variedat de producto, mesmo en ixos que no son consideraus de primer necesidat, como pueden estar os chelaus.

Ista diferecnia en os pres, a o contrario que en atras comunidatz autonomas, no cuenta con aduyas economicas en Aragón. “Desichimos a las autoridatz sanitarias que nos aduyen a aguantar o gasto d’a dieta nuestra”, ha afirmau Panillo. Y ye que en Castiella- La Mancha, Navarra, Valencia u A Riocha tienen recursos economicos u lotes de productos que favoreixen o diya a diya d’os celiacos. Tamién, en muitos países europeus os productos sin gluten son incluyius en o rechimen d’a Seguridat Social.

Cuanto a las teyorías que preban d’explicar o porqué  d’a valor d’ista virolla, bi ha qui dicen que a materia prima ye bien barata, pero a producción ye embolicada. Manimenos atros afirman que a industria s’aprofeita de que “somos un consumidor muito especializau que bosamos a seguridat alimentaria”, ha comentau Panillo.

Cambeos en os costumbres de consumo

Levar una dieta estricta sin gluten y evitar a contaminación cruzada (que virolla y trastes que han teniu contacto con o gluten se mezclen con los sin gluten) son os dos requisitos alazetals que os celiacos han de seguir en a suya vida cutiana. Seguntes l’Asociación Celiaca Aragonesa, o numer d’asociaus s’ha duplicau en as zaguers cinco anyadas. Isto ye por l’amillora d’o diagnostico precoz dende 2008.

Ista malotía chenetica, encara que no pas hereditaria, la desembolica o 90% d’os celiacos potencials, ye decir, aquellas personas cheneticament predispuesta que encara no son estadas diagnosticadas. Porixo, dende as asociacions se preba d’informar a la sociedat y a la industria alimentaria d’os cudiaus queles calen a istos consumidors, ya que “a comunicación entre os diferents sectors ye muito important”, ha destacau Panillo. “Ye dificil fer una dieta estricta sin gluten sinno bi ha información y si no se les informa d’a dieta nuestra a las escuelas, hotels u restaurants ta que los manipolien correctament”, ha rematau.

Panillo ha reconoixiu que gracias a la faina d’as asociacions y d’os consumidors, “a sociedat ye cada vegada más conscient d’ista malotía”. D’ista traza, “a dificultat de fer una vida normal” ha quedau reducida a haber de parar firme cuenta con o que se mincha. Bi ha ninos que “cal concienciar-les dende que les dicen que tienen a malotía”, encara que Panillo ha reconoixiu que son os propios ninos los que tienen prou esclatero que pueden minchar y que no pas.

En Aragón bi ha actualment más de 100 establecimientos unius a lo directorio de l’Asociación Celiaca Aragonesa a qui s’ha informau cómo fer a dieta de traza correcta y tienen una ufierta variada.

 

Fuent: Aragon2.com

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.