Os chardiners de Zaragoza creban as negociacions en “no haber-ie nuevas propuestas”

O miercols, bells treballadors s'encadenoron en o Torreón Fortea mientres más de ueito horas

Bells treballadors en l'aición d'ahiere (Foto: @CGTjardineria)

Bells treballadors en l’aición d’ahiere (Foto: @CGTjardineria)

Os treballadors de Parques y Chardins de Zaragoza, que suman ya 29 diyas de vada, han crebau iste chueves as negociacions con FCC, dimpués d’una reunión que tasament ha durau un minuto. O comité de vada ha criticau a prepotencia d’a interpresa que tien a contrata en “no querer negociar garra aspecto”. FCC les comunicó iste maitin que no bi heba garra propuesta nueva, por lo que continaban vichents as retalladas que se facioron ta febrero.

A negociación d’iste maitin plegaba dimpués d’una gran chornada de movilización, bien vistera. O maitin d’o miercols, bells treballadors de Parques y Chardins s’encadenaban en l’edificio d’o Torreón Fortea, en a Plaza Sant Felipe de Zaragoza, a on que ye o despacho d’o conseller Jerónimo Blasco, a qui consideran “maximo responsable d’o conflicto”. Mientres tot lo diya, os treballadors i continoron, refirmaus antimás por arrienda companyers y personas que se solidarizaban con ells dende os arredols de l’edificio.

A las 20:00 les plegaba una orden de desaloix que no cumplioron en ixe inte, quedando-se-ie dica las 21:30. A ixa hora, entre chilos d’animo y aplausos, deixaban o Torreón Fortea con l’asperanza de nuevas negociacions y propuestas de man d’a interpresa y o concello.

Os treballadors acusan a o PSOE y a Jerónimo Blasco d’a situación y d’as promesas incumplidas y se sienten “ofendius” con un conseller que “no fa que falsiar a realidat”. De man de Blasco, iste maitin declaraba que os ciudadans de Zaragoza “no tienen por qué sentir garra perchuicio por o conflicto que ye en un punto de resolución facil. Charramos d’unas decimas”. O conseller feba tamién un “clamamiento ta que as dos partes fesen un poder y no prolargasen un conflicto que no mereixe la pena.

As movilizacions continarán de man d’os treballadors de FCC. Ya han anunciau la suya presencia en o mitin que celebra ista tarde o PSOE en a Sala Multiusos de Zaragoza con a presencia de Elena Valenciano y Alfredo Pérez. Antimás, o sabado, s’ha organizau un concierto en refirme a la suya vada en o Parque d’a Paz de Torrero con as actuaciones de Gaiteros del Rabal, Manu Haller, Morrophine, Mela Pela Foundation y Mañor Threat.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.