Os comics emplirán a Sala Multiusos de Zaragoza

O salón d'o comic de Zaragoza fa a suya X edición iste cabo de semana

Cartel del SalónO viernes prencipiará o X salón d’o comic y o tebeo de Zaragoza. Dimpués de bellas voces que deciban que talment as retalladas i plegasen y no se podese fer ista anyada, a la fin o salón se podrá fer, si fa u no fa, como en as zaguers edicions. Ista anyada a dentrada costará un euro, estando a primer que no ye de baldes. Como ya ye tradición se regalará o «Tebeíco del salón» a totz qui bi vaigan.
Mientres os tres diyas que durará o salón, se ferán arrienda actividatz. Dende firmadas d’as obras de man d’os autors, dica tallers, exposicions, charradas u debatz. Antimás de os stands d’a Sala Multiusos, atros scenarios d’a ciudat acullirán actividatz relacionadas con o Salón. Ya dende o 1 d’aviento se pueden visitar as exposicions «O hibierno d’o dibuixant» de Paco Roca, en o Paraninfo d’a Universidat, «Hic Sunt Dracones» de Verónica Casas, en o Centro Civico Universidat u «Heroes d’o Comic Europeu» en a Biblioteca Cubit. En a Librería «El Armadillo Ilustrado» a exposición «Cómic» de Piter Saura se podrá viyer dende o diya 12 d’aviento dica o 6 de chinero.

O chueves 15, en o Centro Civico Universidat se ferá boca antis d’o salón. Dende as 20, presentarán o tebeo Belceblues de XCar y Juako Malavirgen y se ferá a grabación d’o RadioTeyatro en Vivo «Episodios Nacionals y Zombis». Tamién tornan a fer-se mosicals, como en atras edicions, en a Sala Venecia. O 16 bi será Inser Coin, presto por l’Asociación Tatakae y o 17 Monster, de la Asociación Mangaku.

O programa d’actos, horarios y toda a información sobre autors, expositors, etc se puet trobar en a web d’o Salón.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.