Os concellos d’o Mayestrato de Teruel declaran os municipios suyos “libres de fracking”

A tecnica de fracking ye periglosa t'o meyo ambient, afirman en un documento más de 50 profesors y investigadors universitarios.

Foto: El Ventano

Foto: El Ventano

Os concellos d’a comarca d’o Mayestrato teruelano son aprebando mocions ta declarar os municipios suyos libres d’o fracking, una tecnica ta quitar gas de debaixo d’a tierra ficando-ie augua a presión con substancias nocivas, seguntes informa El ventano. Más de 50 profesors universitarios han sinyau un documento d’alegacions contra ista practica, que podría prencipiar-se en o Maestrat de Castellón, en a muga con a provincia de Teruel.

En o zaguer pleno comarcal, os lugars d’ista comarca alcordoron oposar-se a lo fracking, pero muitos d’os concellos suyos han quiero expresar o suyo refús tamién de traza individual, como Cantaviella, Tronchón, Fortanet, Mirambel u La Iglesuela, independientement d’a color politica.

O fracking se fa servir ta conseguir gas natural d’esquisto a grans profundidatz de debaixo de tierra. A tecnica pende en foradar un pozo a entre dos y cinco kilometros de fundo y inchectar-ie a presión granizos volumens d’augua, arena y productos quimicos ta trencar as napas de losetas y fer surtir o gas.

O sistema tien risques considerables. Lo más perigloso ye que gran parti d’a mezcla liquida que se inchecta no se recupera. Una parti blinca t’a superficie y atra remane baixo tierra, con a consiguient contaminación d’aqüifers y atras freaticas, seguntes os ecolochistas.

A interpresa Montero Energy, filial espanyola d’a candiense R2 Energu, ha presentau qualques solicitutz en toda Espanya ta fer prospeccions en mirando hidrocarburos. A Generalitat valenciana podría permitir-le en as venients calendatas prencipiar investigacions en bells municipios d’a comarca d’o Maestrar de Castellón, debant d’o refús de concellos y movimientos socials.

Bells 50 profesors y investigadors universitarios, en a suya más gran parti especialistas en cheolochía y hidrocheolochía, han formulau un documento d’alegacions contra ista practica. Os especialistas, encabezaus por o Doctor y catedratico de Cheolochía d’a Universidat de Zaragoza, José Luis Simón, han formulau a suya oposición a los tres permisos demandaus en a provincia de Castellón, que afectarían a 41 terminos municipals.

Entre os sinyants se i troban profesors d’a Universidat Jaume I, Universidat de Valencia, Universidat d’Alcala de Henares, Universidat de Sevilla, Complutense de Madrit y Universidat d’Alicante, entre atras.

 

Fuent: http://elventano.blogspot.com.es/2013/01/los-ayuntamientos-del-maestrazgo-de.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.