Os desafucios creixen un 134% en 2012

Seguntes o president d'o Tribunal Supremo espanyol, as execucions hipotecarias han puyau un 134,13%. Mientres en Malaga dos personas se suicidoron por desafucios a pasada semana

O president d’o Tribunal Supremo y d’o Consello Cheneral d’o Poder Chudicial (CGPJ), Gonzalo Moliner, ha informau en o Congreso d’os Diputaus que as execucions hipotecarias han rechistrau un incremento d’o 134,13% que ha comportau a “consiguient creyación d’un conflicto social”.

Entre a suya intervención en a Comisión de Chusticia ta presentar a Memoria correspondient a 2011, Moliner ha destacau que o numero d’afers ingresaus en a churisdicción civil en os tres primers trimestres d’o 2012 ha disminuyiu un 3,05%. Ista reducción ha estau provocada por a disminución experimentada en os chudgaus de primer instancia (-3,56%), Mercantils (-2,16%), y Primer Instancia y Instrucción (6,40%).

Con tot y con ixo, o president de l’organo de gubierno d’os chueces ha precisau que en os afers computaus ta medir a suya dentrada en os organos churisdiccionals no se i han presto cuenta os procesos monitorios ni as execucions hipotecarias, que, por contra, “se’n han incrementau notablement” dica plegar a o 52,36% d’os procesos monitorios y o 134,13% as execucions hipotecarias reals.

Seguntes ha dito, istos datos trahien a la conclusión que “en realidat no ha baixau a pleitosidat, soque que s’ha modificau a calidat d’a mesma, estando sorprendent l’incremento d’as execucions hipotecarias con a consiguient creyación d’un conflicto social de recient memoria”, en referencia a os desafucios.

Nuevo suicidio en Malaga por un desafucio

Un vecín d’Ardales, en Malaga, se suicidió o pasau sabado por as deudas contrayidas con a hipoteca y recibir una orden de desafucio. Ye o segundo caso rechistrau en a provincia malaguenya en a zaguera semana.

Seguntes han informau dende a Plataforma d’Afectaus por a Hipoteca, iste sabado pasau por a tarde un vecín d’Ardales de 47 anyos, immerso en un proceso de desafucio d’a suya vivienda, decidió de penchar-se aclapau por as deudas.

Fuents municipals han explicau que l’hombre, acomodau y con dos fillos, se trobaba dende feba dos anyos en l’ature, igual que a suya muller. Teneba una orden de desafucio d’a suya vivienda pero heba aconseguiu un alcuerdo con o banco ta solucionar a situación. Manimenos, as deudas contrayidas lo trahioron a o suicidio.

Os vecins d’Ardales se troban commocionaus por iste suceso, ya que se tractaba d’una persona muit conoixida en o lugar, y iste lunes s’han concentrau debant d’una sucursal d’Unicaja, entidat en a qual presuntament teneba a hipoteca, ta remerar a iste hombre y demandar l’aturada d’os desafucios.

Nomás dos días antes d’iste suceso, una muller en Malaga capital se chitó por a finestra de casa dimpués de recibir una carta d’embargo d’o banco. Se trobaba dende feba meses sumida en una depresión y aclapada por as deudas.

Fuent: http://noticies.sirius.cat/2012/12/els-desnonaments-creixen-un-134-el-2012.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.