Os docents d’Educación Fisica refusan a reducción d’horas

Demandan que se'n faigan tres horas semanals en toda la Educación Primaria

Foto: Arainfo vía Marea Verda

Foto: Arainfo vía Marea Verda

Fa bellas semanas a Consellería d’Educación feba publica a nueva distribución horaria semanal d’as asignaturas por curso t’a etapa d’Educación Primaria como conseqüencia d’a implantación d’a LOMCE en Aragón, que será aplicada en os centros o venient curso. Debant d’o “maltracto evident” de bellas materias en a nueva distribución, como en o caso d’a Educación Fisica que baixa a 2 horas semanals, se convocó lo pasau 15 de marzo, una reunión d’urchencia entre docents d’ista especialidat.

O resultau d’a reunión entre as y os profesionals d’ista materia, estió a elaboración d’una nota de prensa y un manifiesto ta “esfender a importancia que tien la Educación Fisica“, refusando con argumentos a nueva propuesa de distribución horario. Pero lo colectivo destaca que no son solos, sino que “a denuncia ye conchunta y o refúes total de man de totz y todas”, y instan a la D.Ch.A a revisar la distribución horario, porque “isto no se puede permitir”, insisten.

“Rebaixar horas con a tramoria de que as extraescolars pueden sustituyir-las ye no conoixer a trista realidat de que muitas familias no tienen prous recursos economicos ta pagar ixas actividatz, promovendo desigualdatz incoderents con a educación basica ta totz. D’atra man, tampoco no se pueden contimparar as actividatz extraescolars u lo tiempo de recreyo, con a clase d’educación fisica, ya que ista suposa estimulo educativo curricular, intencional, planificau y evaluable endrezau por un profesional”, afriman en o manifiesto o colectivo de Profesors d’Educación Fisica.

D’a mesma traza, as y os docents remeran que “seguntes estudios oficials d’o Parlamento Europeu, o Consello Superior d’esportes y o Libro Blanco d’Aragón, bi ha recomendacions y necesidatz de mantener un minimo de tres horas d’educación fisica semanals en edat escolar”, Y adhiben que “bi ha precedents en estudios europeus, como o de Politicas y Practicas d’a Educación Fisica en a Unión Europea, que ya avisan d’a error que suposa rebaixar horas de l’aria d’educación fisica, debiu a que repercute dreitament en l’incremento d’a obesidat y o sedentarismo d’a población a curto plazo, estando todas dos malotías consideradas por o Ministerio de Sanidat, como las pasas d’o sieglo XXI en a Unión Europea”.

En iste sentiu, “dende o compromís y a convicción que nos da creyer de firme en a valura d’o que femos diya par d’atro, en os patios, en os chimnasios d’os nuestros centros, t’aduyar a educar personas más felices, saludables y respetuosas”, demandan “tal y como recomienda o Parlamento Europeu, que bi haiga tres horas semanals ta toda la Primaria”.

Fuent: http://arainfo.org/2014/05/los-docentes-de-educacion-fisica-rechazan-la-reduccion-de-horas/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.