Os escraches, viedaus a menos de 300 metros d’as casas d’os politicos

Bells cientos de personas se concentroron iste martes debant d'a casa d'Eloy Suarez, diputau d'o PP.

A concentración debant de casa d'Eloy Suarez (Foto: Pablo Ibáñez, vía Arainfo)

A concentración debant de casa d’Eloy Suarez (Foto: Pablo Ibáñez, vía Arainfo)

O ministerio d’Interior espanyol ha dau instruccions a la policia ta que viede os escraches, que fa la Plataforma d’Afectaus por a Hipoteca, a menos de trescientos metros d’as casas d’os politicos. Asinas lo ha explicau o secretario d’estau de seguridat, Francisco Martínez, qui ha dito que s’estudiaría cada caso de protesta.

O director d’a policía espanyola, Ignacio Cosidó, ha dito: “Bi ha actitutz d’asedio y faltadas, d‘agresions verbals u fisicas que son practicas totalitarias y que demandan no nomás l’actuación d’a policía, sino tamién una condena de propio de totz os que creyemos en a democracia”. L’emplego de terminolochía como la que feba servir o chefe d’a policía, referindo-se a “practicas totalitarias”, ye estau peren de man de miembros d’o PP y d’o gubierno en mirando de desprestichiar a la PAH.

Ahiere en Zaragoza bells cientos de personas se concentroron debant d’a casa d’Eloy Suárez, diputau por o PP, en o Paseu d’as Damas ta mirar de fer-le venir a plego cuanto a la suya posición sobre a ILP d’os desafucios. Un ratet dimpués, a manifestación se’n iba ent’a siede d’o PP, a on que decenas de policias espanyols los privaban d’amanar-se-ie. A tamás d’as numerosas identificacions policials, a concentración remató sin garra incident.

Pablo Híjar, un d’os representants de Stop Desafucios declaró que a plataforma heba “acotolau todas as vías administrativas que ufre iste gubierno suposadament democratico ta conseguir que siga aprebada una ILP refirmada por 1,4 millons de firmas y que, a truca, no ha recibiu que parches, silencio y criminalización”.

ACTUALIZACIÓN

Mientres o miercols, as versions cuanto a istas ordens son estadas prou contradictorias. Jorge Fernández Díaz, ministro d’Interior ha desmentiu que s’hese dau ixa orden, encara que si que ha charrau d’establir nuevas distancias de seguridat. Manimenos bells meyos, como eldiario.es, han publicau una comunicación urchent d’a policía d’o martes de nueitz a on que sí se charra d’ixe cordón de 300 metros.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.