Os estudiants de FP habrán de pagar dica 245 euros por os suyos estudios

A mida ye estada criticada por bells sectors. En Madrit y Catalunya ya cal pagar tasas parellanas.

Marco Rando presenta a nueva ufierta de FP (Foto: D.Ch.A.)

Marco Rando presenta a nueva ufierta de FP (Foto: D.Ch.A.)

Os estudiants que faigan bell estudio de Formación Profesional (FP) de grau superior a partir d’o curso 2013-2014 habrán de pagar una matricla de 35 euros por modulo formativo dica un maximo de 245 por curso completo.

Ye a primer anyada que s’establirá ista mida en Aragón. Dica agora l’alumnalla d’istos estudios pagaba nomás una chicota cantidat en concepto de seguro escolar y matricla.

Ta chustificar iste pago, o director cheneral de Ordenación Academica, Marco Rando, ha explicau que os estudios de FP son “profesionalizantes, parellanos a las amostranzas en rechimen especial u los graus universitarios”. Tamién ha dito que muitos alumnos desapareixen a metat curso y que aspera que ista mida faiga que se i matriculen os que son más intresaus. Ista mida de haber de pagar tasas por os estudios de FP ya ye funcionando en Catalunya y Madrit. Rando explicó que ye prebable que se aplique en más territorios en as anyadas venients.

Dende bells sectors ya han plegau muitas criticas. Ta Gregorio Briz, de Chunta Aragonesista (CHA), iste ye “o primer trango ta que deixe d’estar de baldes toda l’Amostranza no obligatoria, como lo Bachillerato u a Educación Infantil”. Dende o sindicato CGT (Confederación Cheneral d’o Treballo)creyen que con ista mida “s’amuga l’acceso t’a Formación Profesional t’as familias más desfavoreixidas y no se guarancia a formación universal y de baldes”. CGT da antimás una alternativa  ta cabidar diners: “se puet prencipiar por no renovar os conciertos en ista etapa, que no ye una etapa obligatoria” y remeran que agora mesmo bi ha 68 unidatz de FP de grau superior concertadas.

Nueva ufierta d’estudios

O chueves se presentó tamién a nueva ufierta d’estudios. En total s’impartirán 98 ciclos formativos diferents, d’os quals 61 serán de grau superior y 37 de meyo. 17 d’ells se cursarán por primer anyada. A ista ufierta cal adhibir 21 programas de Qualificación Profesional.

De cursos presencials, se’n encetan quatre nuevos: Dirección de Servicios de Restauración y Amostranza Esportivas de futbol-ran III en Teruel, Mecatronica Industrial en Zaragoza y Amostranzas Esportivas de futbol – bloque común en Uesca.

Tamién se concertarán seis ciclos de grau meyo. A Fundación Arsenio Jimeno de UGT impartirá “Soldadura y Calderería” y “Carrocería”. En a Fundación Laboral d’a Construcción se podrá estudiar “Construcción” y Operación y Mantenimiento de Maquinaria de Construcción”. Artemis impartirá os estudios de “Estetica personal decorativa” y “Peluquería y Cosmetica capilar”.

Rando ha explicau que ye intención d’o gubierno enfortir a educación a distancia. Por ixo ista anyada bi habrá siet estudios nuevos en ista modalidat: “Atención ta personas en situación de dependencia” en Uesca, “Sistemas microinformaticos y retes”, “Achencias de viaches y chestión d’eventos”, “Transporte y lochistica”, “Administración de sistemas informaticos en Rete” y “Administración y Finanzas” en Zaragoza y “Chestión administrativa” en Teruel.

Atros estudios, manimenos desapareixen, seguntes Educación, por falta d’alumnalla. Ye o caso d’o ciclo meyo de Fabricación de fustería en Chaca, os ciclos de Desembolique de productos en fustería y Prevención de risques laborals en Teruel y o ciclo superior de Sistemas electrotecnicos en Samianigo. Tamién os ciclos de Chestión d’o transporte, en Fraga y Teruel pasarán d’estar presencials a fer-se a distancia.

En total bi ha quasi 16.000 plazas en ista mena d’estudios, 6.000 d’ellas de grau superior. “O departamento d’Educación apuesta de traza decicida por empentar ista mena d’amostranzas”, dició Rando, qui creye “que son una vía fundamental” ta que os más chovens y os esqueferaus puedan trobar treballo.

2 Rispuestas a Os estudiants de FP habrán de pagar dica 245 euros por os suyos estudios

  1. Pingback: Os estudiants de FP habrán de pagar dica 245 euros por os suyos estudios | AraInfo | Achencia de Noticias d´Aragón

  2. A yo presonalment me pareix que si quieren que os estudiants merquemos os modulos de Formación Profesional, primer caldría mirar bien o libel d’os mayestros ta guarenciar que o que yes mercando ye de calidat porque bi ha muit buenos mayestros y tamién bi’n ha muit zaborreros Y lo digo yo que plego de fer un ciclo de grau meyo y dos de grau superior.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.