Os estudiants d’instituto continan con as protestas en o tercer diya de vada

O seguimiento ye estau masivo y ha plegau en tot Aragón de diferents trazas

Una d'as manifestacions (Foto: Marea Verda)

Una d’as manifestacions (Foto: Marea Verda)

A vada d’estudiants d’instituto plega t’o suyo tercer diya con protestas convocadas por tot lo país. O seguimiento seguntes os organizadors ye estau prou altero, puyando d’o 70%. En muitos institutos s’ha plegau dica un 90%, estando más seguida en os cursos superiors y en os ciclos formativos (Formación Profesional). A vada ye estada convocada a ran estatal por diferents colectivos y organizacions estudiantils.

Iste miercols, una manifestación de miles d’estudiants marchaba por o Paseu Independencia baixo lo lema “Contra as retalladas, no a la lei Wert, abaixo lo gubierno d’o PP”. Hue, una atra manifestación prencipiará a las 12:00 en o Paraninfo, endrezando-se enta la Delegación d’o gubierno espanyol, a on que rematará. De tardes, as asociacions de mais y pais, os sindicatos d’o profesorau y a Marea Verda se unirán a os estudiants en una concentración debant d’o Pignatelli a las 19:00.

Mientres o maitin d’o miercols, a policía fació indentificar-se a bells 30 estudiants “por interrumpir o trafico y faltar a los achents”. Os estudiants iban chuntos dimpués d’a manifestación por o Paseu y denuncian que a policía yera “acosando-los dende o Casco Viello”. Encara que se inviará un informe t’a Delegación d’o gubierno espanyol, a policía ha dito que “no se les meterá pinyora”.

En Uesca a concentración de refús t’a politica educativa se fació en as puertas d’o Concello. O seguimiento tamién puyó d’o 70% en os centros Lucas Mallada, Pirámide, Sierra de Guara y Ramón y Cajal. En Teruel, una manifestación prencipiará hue a las 11:00 en o Campus Universitario.

As protestas por as midas educativas d’os gubiernos espanyol y aragonés tamién han plegau ta muitos lugars d’Aragón. En Tarazona, bells profesors levan diyas enzarraus en o IES Tubalcaín.

En Andorra, alumnos de l’instituto Pablo Serrano, acamporon en a Plaza d’o Regallo a nueit d’o 5 t’o 6. De diyas heban quitau as mesas d’o centro t’a plaza ta fer-ie clase como traza de protesta.

En as Cuencas mineras, as protestas plegoron ahiere en forma de una marcha que secundoron más de 2000 personas reivindicando a escuela rural. A marcha estió refirmada por totz os partius politicos – incluyius PP y PAR, qui  refirman o gubierno – y surtió dende os  lugars de Escuita, Martín, Muniesa, Mont Albán y Cabra ta plegar en Utriellas. As prevision d’as retalladas ferían perder 7 aulas y dica 11 profesors en ista redolada

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.