Os estudiants votan de forma masiva a favor de mantener “os setiembres”

A participación puyó d'o 50%, por dencima d'o 30 que exichiba o rectorau

Ringlera ta votar en a Escuela d'Incheniería (Foto: @ecoingenierio)

Ringlera ta votar en a Escuela d’Incheniería (Foto: @ecoingenierio)

Contra os pronosticos más optimistas, y a tamás d’os problemas organizativos, a participación en a consulta d’iste miercols en a Universidat sobre o calendario academico, tenió una participación d’un 53,51% de l’alumnalla, muit por dencima d’o 30% minimo que exichiba o rectorau, y d’o 10% que gosa estar a cifra cutiana en eleccions a representants d’estudiants u a rector.

O mensache d’os estudiants ye estau prou claro. Un 86,21% han votau a favor de mantener a convocatoria de setiembre, y en contra d’o nuevo calendario proposau por o rectorau. En ixe calendario desapareixeba ixa convocatoria, habendo-ne dos a la fin de cada cuatrimestre y prencipiando lo curso a primers de setiembre.

Dende muitas organizacions estudiantils s’heban feito prous queixas por o modelo de consulta. A calendata no dió tiempo quasi a fer campanya en conoixer-se con bell poco más d’una semana de tiempo. As exichencias ta que a consulta se tenese en cuenta, un 30% de participación, y un 60% de voto en contra d’a propuesta de rectorau, pareixeban masiau furas y inchustas, en opinión d’istos colectivos. Manimenos, os estudiants han cumpliu as dos condicions, y con muito marguin.

Atras queixas plegoron por a propia lochistica d’a consulta. En bells centros bi ha habiu pocas urnas, en opinión de muitos estudiants. As ringleras de votants entre clase y clase, se facioron prou largas y mesmo calió ixamplar o numer d’urnas en bell centro.

Agora la decisión ye en mans d’o Rectorau, pues a consulta no yera vinculant. Con tot y con ixo, no pareixe que una respuesta tant firme de man d’a estudiantalla pueda no ascuitar-se. Fernando Zulaica, vicerrector d’estudiants, se felicitaba ahiere por a graniza participación que bi ha habiu, que contrimostraba que iste yera un “tema que preocupaba muito a los estudiants”.

 

Una rispuesta a Os estudiants votan de forma masiva a favor de mantener “os setiembres”

  1. Pingback: A estudiantalla d'a Universidat de Zaragoza vota de forma masiva a favor de mantener “os setiembres” » AraInfo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.