Os incidents d’o 14-N tornan a meter dencima d’a mesa o debat sobre as balas de goma

O consellero Felip Puig niega que Quintana perdese un uello por una acción d'os mossos. A oposición y plataformas demandan que se viede l'emplego d'istos prochectils

O consellero d’Interior, Felip Puig, compareixió ahiere en o parlament ta explicar l’actuación d’os mossos entre l’escureixiu d’a vada cheneral d’o 14 de noviembre. Y negó que Ester Quintana hese perdiu un uello por garra acción d’os mossos. A oposición y as plataformas Stop Bales de Goma y Rereguardia en Moviment han criticau as declaracions de Puig y han tornau a meter dencima d’a mesa o debat sobre l’emplego d’as balas de goma.

Puig dició ahiere que lamentaba as lesions en o uello d’Ester Quintana, pero descartó que estasen responsabilidat d’os mossos. Seguntes o consellero, en a confluyencia d’o paseu de Gracia con a Gran Vía aquell escureixiu no se fació garra lanzamiento de prochectil, nomás dos salvas. En cambeo, dició que en aquella zona sí que i heba ‘individuos encapuchaus’ que heban lanzau obchectos.

As parolas de Puig contrastan con as de quantos testigos, replegaus en un vidio, y con as d’Ester Quintana, que tamién explicaba que i heba visto como os mossos cargaban y que ella yera a preba. ‘Sé que un mosso con un prochectil me fació isto‘.

A plataforma Rereguardia en Moviment, a colla de refirme a Ester Quintana, y representants de Stop Bales de Goma reprochan que Puig no diz a verdat y denuncian falta de transparencia. ‘Cada vegada i hai mas victimas d’a violencia policial desmesurada, y cada vegada se deixa mas marguin a o cuerpo de policía ta exercer ista violencia con total impunidat’, diz Stop Bales de Goma en un comunicau, y remeran que i hai uns quantos testigos que han declarau o contrario de Puig y que mesmo belún ha replegau prochectils en ixa zona: ‘U miente reiteradament, u bien a dirección d’a policía le facilita informes falsos y ell confita ciegament.’ En iste caso, denuncia ‘a posibilidat concreta de que o cuerpo d’os mossos actúe de traza independient d’o consellero y d’o director cheneral d’a policía catalana, Manel Prat’. Finalment, Stop Bales de Goma demanda a dimisión de Puig y Prat y que se disuelva a brigada mobil d’a policía como ‘unidat de tot descontrolada y d’enorme periglosidad t’a sociedat’.

O portavoz d’a colla de refirme a Ester Quintana, Joni, insiste en dicir que ‘a mida d’a ferida, a mena de lesión y a velocidat no fan dubdar’ sobre l’orichen de l’impacto, y asegura que o dictamen medico tamién lo sinyala.

Por o que fa a os grupos d’a oposición, tanto o PSC como ERC y ICV-EUiA demandan que se reconsidere l’emplego d’istos prochectils en as actuacions antidisturbios. Puig se comprometió ahiere a debatir a qüestión entre a lechislatura que luego empecipiará.

O menor feriu en Tarragona

Por o que fa a os incidents de Tarragona, Puig explicó que unas 150 personas con sinyals d’a CGT heban causau danyos en bells puestos d’a ciudat, y en a plaza d’a Generalitat heban atacau a os policías que protecheban El Corte Inglés, aventando-les obchectos contundents como por eixemplo botellas de veire, piedras u piezas de fierro que trahieban en mochilas u que pillaban d’os contenedors. O chefe d’o dispositivo ordinó a contención y, dimpués, a dispersión, de primeras con furgoneta y mas tarde a piet.

Mientres a persecución, un d’os mossos dio un truco, ‘de rebote, involuntario y fortuito’, a un menor, que habió d’amenistar quatro puntos de sutura en a cabeza. Dos achents que no heban visto l’acción trucoron a una mesacha acochada que protecheba a o menor y unatra que les recriminaba l’acción. ‘As imachens incomodan y carranyan’, diz Puig, que considera que l’acción d’os achents ‘pareixe desproporcionada y podría no achustar-se a os protocolos establius’. Por ixo s’ubrió un expedient informativo que agora ha quedau suspenso porque s’ha encetau una investigación chudicial. Os tres achents i embrecaus continan en a suya unidat, pero no participarán en actuacions d’orden publico dica que no se zarre l’expedient.

Testimonio d’Ester Quintana

Vidio d’o menor feriu en Tarragona

Testimonios d’o 14N

Fuent: http://www.vilaweb.cat/noticia/4061458/20121204/incidents-14-n-tornen-posar-damunt-taula-debat-bales-goma.html

Una rispuesta a Os incidents d’o 14-N tornan a meter dencima d’a mesa o debat sobre as balas de goma

  1. Me canso de dicir-lo, frent a la Policía espanyola solament cal usar as mesmas armas y no correr debant d’ells, si no dezaga. Hemos de pensar que ye mayor o numero de manifestantes que o de policías. Tirador y torniellos ye buena ferramienta t’as manis

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.