Os inspectors d’a ONU escomencipian a investigar l’ataque con armas quimicas en Siria

O gubierno ruso sospeita d'os feitos y creye que podrián estar una provocación

Manifestación a favor d'Al Assad. Foto: Beshroffline (CC-BY)

Manifestación a favor d’Al Assad. Foto: Beshroffline (CC-BY)

Os inspectors d’a ONU empecipian hue a investigar en Siria o puesto an que pareixe que i habió un ataque con armas quimicas contra os rebeldes, o pasau mierques. O gubierno d’Al Assad autorizó finalment ahiere que se i ninviasen inspectors, que empecipiarán a treballar hue pa corroborar si se fació servir armas quimicas u no. Os países occidentals creyen que estió asinas, pero o gubierno ruso sospeita que se tracta d’una provocación d’a oposición.

Aleksandr Lukashevich, portavoz d’o ministro d’Afers Extranchers ruso, dició que, seguntes as suyas informacions, o gubierno sirio no heba emplegau armas quimicas y que os feitos descritos a semana pasada podeban estar una provocación d’os opositors pa causar a reacción de Nacions Unidas u, mesmo, que podeba estar un montache. En anteriors ocasions, Siria ya heba estau acusada de fer servir armamento quimico, pero nunca no s’ha plegau a verificar.

A reacción d’as autoridatz sirias ha estau criticada por qualques gubiernos, que afirman que os días que han pasau ferán inutil a inspección por a degradación d’as prebas. Médicos sin Fronteras emitió un comunicau a on afirmaba que en tres hespitals de Damasco s’heban atendiu o mierques 3.600 personas con simptomas propios de l’uso d’armamento quimico, d’as qualas 355 morioron. En o mesmo comunicau, Médicos sin Fronteras aclariba que no podeba saber quí heba estau l’atacant ni podeba prebar de traza scientifica que estase un ataque con armamento quimico. Con tot y con ixo, os pacients respondioron en estar tractaus con atropina, una medicina que s’emplega pa tractar problemas neurotoxicos.

Fuent: http://www.vilaweb.cat/noticia/4140304/20130826/inspectors-lonu-comencen-investigar-latac-armes-quimiques-siria.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.