Os islandeses apreban o esbruixallo de nueva constitución

Un 66% refirma o texto redactau por vinticinco ciudadans con alportacions vía Facebook y Twitter.

Asambleya Constituyent (Foto: Stjórnlagarád)

Asambleya Constituyent (Foto: Stjórnlagarád)

Un 66% d’os islandeses que participoron en o referendum sobre l’esbruixallo de nueva constitución l’han refirmada. Ye estada redactada por una comisión de vinticinco ciudadans, trigada en noviembre de 2010 y se i han admitiu alportacions vía Facebook y Twitter.

En o referendum d’ahiere, i participó a mitat de l’electorau, mayoritariament favorable a la reforma proposada d’a constitución. Como no ye vinculant, agora o parlamento ha de decidir si accepta as reformas u no pas.

Ahiere os ciudadans islandeses pasoron por as urnas ta decidir si as proposas d’o consello constitucional han d’estar a base d’o nuevo esbruixallo d’a constitución. A consulta tamién bi incluiyiba cinco preguntas particlars (tamién aprebadas), como si s’heban de nacionalizar os recursos naturals que no sigan de propiedat privada.

Revolución democratica

Dende os problemas que tenión Islandia en 2008, con o fundimiento de tres bancos y a cayida libre d’a moneda y d’o PIB, ista isla de l’Atlantico norte s’ha recuperau economicament gracias a una ola de recheneración democratica sin precedents, vista asoben como un modelo en tot lo mundo. Os islandeses cambioron o gubierno y imposoron una reforma constitucional por un procedimiento orichinal, que ahiere plegó en una fase crucial con o referendum sobre l’esbruixallo de constitución presto por una comisión de vinticinco ciudadans.

O 16 de chunio de 2010 o parlamento islandes aprebó a formación d’una asambleya constitucional (Stjórnlagaþing) que heba de revisar a constitución d’o país. O 27 de noviembre d’ixa mesma anyada estioron esleixius vinticinco delegaus, entre ciudadans de tot lo país. O tribunal supremo invalidó o voto por bellas irregularidatz formals, peor o parlamento decidió d’integrar os vinticinco delegaus en un consello constitucional ta que continase redactando l’esbruixallo, que se presentó en o parlamento o 29 de chulio de 2011.

 

Fuent: http://www.vilaweb.cat/noticia/4049103/20121021/islandesos-aproven-lesborrany-nova-constitucio.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.