Os mayestros mexicanos intensificarán as suyas protestas dimpués d’a represión policial

A CNTE, que lidera a protesta contra a reforma educativa, acusa a policía y infiltraus d'as muertes y represión exercida contra as manifestants

Barricadas contra l'actuación d'os policías federals. Foto: Youtube

Barricadas contra l’actuación d’os policías federals. Foto: Youtube

A manifestación d’o pasau domingo d’os mayestros d’o Estau mexicano d’Oaxaca tenió una final sangrienta: tretze muertos, 25 desapareixius y 45 ferius de bala, seguntes a Coordinadora Nacional de Treballadors d’a Educación (CNTE), agrupación a la quala perteneixeban os manifestants. Entre os fallecius i heba civils, un periodista que cubriba as protestas (Elidio Ramos, treballador d’o diario El Sur) y un numero indeterminau de docents.

Os sindicalistas han anunciau que, leixos de detener as movilizacions, istas se van a endurecer dimpués d’os episodios de represión “de forma contundent, ordinada y pacifica”, afirmó Juan García García, un d’os portavoces d’a CNTE, seguntes replega l’Achencia EFE.

García declaró a medios mexicanos que os episodios violentos los provocoroninfiltraus y a mesma policía“. “Os policías portiaban armas, disparoron sin piedat en contra d’os nuestros companyers, a ixo fuoron t’o puesto an que os nuestros companyers se yeran manifestando pacificament”, continó.

Os mayestros se manifestaban contra o Gubierno d’Enrique Peña Nieto por os problemas derivaus d’a reforma educativa de 2013, asinas como ta reclamar a liberación de tres sindicalistas: o secretario cheneral y d’a sección 22 d’a CNTE Rubén Núñez y Francisco Villalobos, y o exsecretario cheneral d’a sección 18 Juan José Ortega Madrigal. Entre as protestas, os mayestros habrían bloquiau l’autopista Oaxaca-Mexico a l’altura d’a localidat de Nochixtlán, a on se producioron os sucesos.

Manimenos a información emitida por a Comisión Nacional de Seguridat (CNS) que afirma que “os achents no son armaus“, a fiscalía ha asegurau dimpués de l’autopsia de siet calavres que o fallecimiento estió provocau pordisparos de proyectil d’armas de fuego“, seguntes informacions d’AFP. A CNS anunció o inicio de “una investigación con a finalidat de deslindar responsabilidatz y, en o suyo caso, actuar en conseqüencia”.

A versión d’o gubierno d’Oaxaca ye tamién distinta a la d’a CNTE. O Secretario gubernamental d’Oaxaca, Gabino Cué, refusó que os achents isen os responsables d’os disparos. Achacó a violencia perpetrada solament a infiltraus: “Personas embozadas allenas a l’obchectivo d’a manifestación”. Manimenos, Cué presientó a renuncia a o suyo cargo por estar en desacuerdo con l’ocurriu y no querer lechitimar as accions d’o Gubierno federal.

O gubernador electo d’o estau sudenyo, Alejandro Murat, se lamentó por os feitos a traviés d’a suya cuenta de Twitter: “Os oaxaquenyos refusamos enerchicament qualsiquier acto de violencia. ¡Os oaxaquenyos no queremos ixo! O dialogo incluyent y respectuoso ye a vía ta una solución chusta y digna”.

O luns, un día dimpués de l’enfrontinamiento, mils d’oaxaqueños encabezaus por a CNTE se manifestoron ta condenar os asesinatos, exichir a dimisión de Cué y demandar un chudicio politico contra o president Enrique Peña Nieto y o titular d’a Secretaría d’Educación Publica (SEP), Aurelio Nuño.

En retz, arredol d’o hashtag #OaxacaResiste, tamién s’ha concentrau numerosas muestras de condena a os asesinatos y d’emparo a os manifestants.

As protestas no son cosa nueva en iste estau sudenyo mexicano. En 2006 se produció un aturo laboral que duró mas de seis meses que tamién remató con decenas de muertos y disidents presos, y a fuerza d’os movimientos socials revivió en os zaguers tres anyos dende a reforma educativa de Peña Nieto. A CNTE siempre ha estau muit critica con qualques aspectos d’ixa lei, como o sistema d’evaluación de mayestros u l’autochestión d’as escuelas, amás de por o feito que no fuesen consultaus ta imposar-la. En mayo de 2016 prencipió un nuevo pico de manifestacions, tamién en Ciudat de Mexico y Michoacán, dimpués que se despedise a 4.000 mayestros y mayestras por haber-se oposau a la reforma.

Fuent: http://www.eldiario.es/internacional/muertos-enfrentamientos-maestros-policia-Oaxaca_0_529147819.html#

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.