Os mayors d’Alto Galligo treballan a suya independencia

As personas mayors d’a comarca de l’Alto Gállego contan a partir d’iste mes con un programa ta que avielleixcan con una riseta. Baixo o nombre de Vivir sin depender, l’obchectivo ye aconseguir amillorar a calidat de vida de todas as personas que quieran participar.

En total, a zaguera temporada se beneficioron d’iste programa 60 mayors. Os chuegos de memoria son as actividatz con mayor acceptación en a población, ha explicau o treballador social d’a Comarca encargau de levar iste programa, Antonio Matías, qui ha esplanicau que treballar con personas adultas ye muit gratificant dau o ran de participación y que se tracta de personas que agradeixen o treballo y son pro voluntariosas.

Ixa fin s’aconseguirá a traviés de tallers en que se i treballará o cudiau y mantenimiento d’o cuerpo y a mente de forma amena y divertida. Asinas, d’octubre a aviento tendrá puesto o taller Activación de Memoria y una trobada de Nadal en Samianigo; de chinero a marzo de 2012 se darán chuegos ta pensar, taller d’expresión corporal, en primavera de gastronomía y una excursión ta Uesca ta veyer a representación teatral d’a Pasión.

En zaguerias, d’abril dica chunio se realizarán tertulias sobre cómo se’n viviba antes, un taller de cine y una excursión, que encara ye por determinar. Os puestos esleius son Sallén, Pandicosa, Yebra de Basa, Biescas, Yésero, Foz de Tena y Caldearenas. Os pres puyan dica 30 euros ta participar en tot o prochecto, cubrindo asistencia y desplazamientos, ixo sí no cubre as dentradas a museos, espectaculos y os minchars.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.